DC AZINDUA KUANZA KWA MASOMO KWA SHULE MPYA 6 MBARALI

Posted on: August 6th, 2020

Mkuu wa Wilaya ya Mbarali Mhe. Reuben Mfune amezindua kuanza masomo kwa shule mpya 6 za Sekondari zilizosajiliwa wilayani hapa ili wanafunzi wote waliochaguliwa kujiunga kidato cha kwanza na walioanza  masomo kwenye shule za kata za jirani warudi kwenye shule za kwenye kata zao kuendelea na masomo.

Mhe. Mfune amefanya uzinduzi wa shule hizo alipofanya ziara ya kuweka mawe ya msingi pamoja na kuzitembelea shule hizo kuanzia tarehe 22/07/2020 hadi tarehe 30/07/2020 wilayani hapa. 

Akiwa katika uzinduzi huo Mhe Mfune amewataka wananchi kuendelea kuongeza majengo mengine muhumu ili shule hizo ziweze kukamilika kuanzia vyumba vya madarasa, maabara, vyoo pamoja na majengo ya utawala.

“Hatuwezi kujua mwaka kesho watafaulu wanafunzi wangapi, maoteo ya madarasa mmeshapewa, tuhakikishe malengo yetu ya kuongeza vyumba vya madarasa yanatimia, kwani tukifuata maelekezo tuliyopewa tutakuwa na vyumba vya kutosha, tufanye kazi kwa bidii sasa hivi ili baadae tupate ahueni.”

“Najua bado tuna changamoto kwani kuna vijiji bado vipo mbali na shule, ila tuamini kuwa tumepungaza umbali tofauti na ilivyokuwa awali, mtoto hawezi kuzaliwa siku hiyo hiyo na akaweza kufanya kila kitu, changamoto zinanendelea kuatuliwa, na nina imani ndani ya miaka miwili shule zetu zote zitasimama na zitakuwa bora zaidi.” Alisema Mhe. Mfune 

Mkuu wa Wilaya amewashukuru wananchi kwa kufanikisha ujenzi wa shule hizo kwani zimekuwa faida kwa watoto wetu kwani kwa sasa wanafunzi wanauwezo wa kuwahi kwenda shuleni na kurudi muda unaotakiwa.

Kwa upande wake Kaimu Afisa Elimu Sekondari Bi. Anna Shitindi alisema kwamba, kwa sasa Halmashauri ya Wilaya ya Mbarali ina shule 24 za sekondari, kati ya shule hizo shule 16 ni kongwe, shule mbili zilianza kutoa elimu mwaka 2019 na shule mpya 6 zimeanza kutoa elimu mwaka huu 2020.

Bi. Shitindi aliongeza kuwa kuna shule mbili ambazo ni Luhanga Sekondari pamoja na Haroon sekondari zipo katika hatua ya kuridhisha na zinategemewa kupata usajiri pamoja na kuanza kutoa elimu mwaka 2021. Vilevile Halmashauri imefanikiwa kuanzisha shule mbili mpya za kidato cha tano na sita na kufanya kuwa na jumla ya shule nne.

Baadhi ya wananchi waliohudhuria uzinduzi wa shule hizo, wameishukuru Serikali kwa kufanikisha kufunguliwa kwa shule hizo kwani kabla ya hapo watoto wao walikuwa wanasafiri umbali mrefu kutafuta elimu. Vilevile wamewashukuru wadau wote wa maendeleo walioshiriki na wanaoendelea kushiriki kuinua sekta ya elimu wilayani hapa.

Shule mpya sita zilizowekewa mawe ya msingi pamoja na kuzinduliwa uanzaji ni Shule ya Sekondari Nyamakuyu, Shule ya Sekondari Muwale, Shule ya Sekondari Itamboleo, Shule ya Sekondari Kapunga, Shule ya Sekondari Mkanyageni pamoja na Shule ya Sekondari Mwatenga.MWISHO