MWENGE WA UHURU WILAYANI MBARALI

Posted on: October 8th, 2025

*MWENGE WA UHURU WATEMBELEA, KUFUNGUA NA KUWEKA MAWE YA MSINGI MIRADI 6 WILAYA YA MBARALI*

Mkuu wa Wilaya ya Mbarali Mhe. Brigedia Jenerali Maulid H.Surumbu ameongoza Kamati ya Mapokezi ya Mwenge pamoja na Kamati ya Ulinzi na Usalama ya Wilaya hiyo kupokea Mwenge wa Uhuru leo Oktoba 08, 2025 katika Uwanja wa Shule ya Msingi Kongolo Mswiswi uliopo Wilayani humo na kuupitisha katika miradi mbalimbali ambayo iliwekwa mawe ya msingi pamoja na kufunguliwa.

Katika mbio hizo Kiongozi wa Mbio za Mwenge ameonesha kuridhishwa na hatua mbalimbali ambazo miradi hiyo imefikiwa huku akipongeza Uongozi wa Wilaya hiyo kwa usimamizi mzuri na utekelezaji wa miradi hiyo ambayo kwa ujumla itakuwa na manufaa mbalimbali kwa wananchi wa Wilaya hiyo.

Katika mbio hizo Mwenge wa Uhuru umeweka mawe ya msingi katika Miundombinu za Hospitali ya Wilaya ya Mbarali ambayo iko katika hatua za mwisho za ujenzi, Mradi wa Maji eneo la Chimala, Kituo cha mafuta cha Crive Petroleum ambacho kimekamilika na kinatarajiwa kuanza kutoa huduma wakati wowote kuanzia sasa, jiwe la msingi barabara ya Komba Machicho; na pia kutembelea na kuona shughuli za ujasiriamali zinazofanywa na Kikundi cha vijana cha Mtukazi kilichopo Uhambule Kitongoji cha Kibaoni.

Aidha katika Mbio hizo za Mwenge mradi wa vibanda 14 vya biashara vilivyojengwa na Halmashauri ya Wilaya ya Mbarali vilifunguliwa ambapo vibanda hivyo vilivyopo eneo la Kituo cha Mabasi Igawa vimekamilika na viko katika hatua za kupata wapangaji ili viendelea kutoa huduma, pia 

Kiongozi wa Mbio za Mwenge wa Uhuru, Ismail Ali Ussi amewapongeza wananchi wa Wilaya ya Mbarali kwa jitihada zao katika kujiletea maendeleo huku akisisitiza kuwa Serikali itaendelea kushirikiana nao kwa namna mbalimbali kuwainua kiuchumi ikiwemo kutoa mikopo ambayo husaidia shughuli zao ambapo wananchi wengi Wilayani humo ni wakulima wa zao la mpunga na wafugaji.

Mwenge wa Uhuru umehitimisha shughuli za kutembelea, kuweka mawe ya msingi na kufungua miradi hiyo katika Wilaya ya Mbarali na unatarajiwa kukabidhiwa Halmashauri ya Wilaya ya Mbeya kesho Oktoba 09, 2025 katika eneo la Inyala Jijini Mbeya ambapo utaendelea kukimbizwa maeneo mbalimbali ya Jiji hilo ambapo kilele cha mbio hizo kinatarajiwa kuwa Oktoba 14, 2025 Jijini Mbeya.