TASAF SASA KUTUMIA MFUMO WA KIELECTRONIC KULIPA KAYA MASIKINI

Posted on: July 10th, 2020

Hayo yamesemwa na Meneja Miradi ambaye ni Kiongozi wa Timu ya Taifa kwa ajili ya kazi ya Uhakiki wa kaya kutoka TASAF Makao Makuu Ndg Shabani Abdumalick alipokuwa akiendesha kikao kazi kwa Wakuu wa Idara na Vitengo pamoja na mafunzo ya kuwajengea uwezo wawezeshaji wa Halmashauri ya Wilaya ya Mbarali kuhusu utekelezaji wa kipindi cha pili awamu ya tatu ya Tasaf  na  zoezi la uhakiki wa walengwa wa kaya masikini siku ya terehe 09/07/2020.

Ndg. Shabani alisema kuwa malipo yote kwa sasa yanatarajiwa kulipwa kwa kutumia mfumo wa Kielectronic kwa wanufaika watakuwa wanapokea malipo yao kwa kutumia simu zao, kwa njia ya mawakala au dawati la Bank kwa lengo la kupunguza gharama za usafiri pamoja na changamoto zilizojitokeza katika awamu iliyopita.

“Zoezi la sasa linatarajiwa kufanyika kwa njia ya mfumo wa kielectronic, na baadae tutaacha kutumia magari kupeleka pesa vijijini, mlengwa atatakiwa kuleta namba ya simu iliyosajiliwa na kwa ambao hawatakuwa na simu tutawawekea utarabu unaofaa. Tunanza uhakiki kwa kutumia vishikwambi (Tablet) ambazo zitakuwa zikitumika kubeba dodoso fupi litakalofanya kazi ya uhakiki wa taarifa.

“kinachofanyika kwa sasa ni uhakiki ili kusafisha daftari libaki na kaya ambazo zina sifa za kuendelea kuwa kaya masikini ili ziweze kuendelea kupata rudhuku ya Serikali kutoka TASAF. Tunahakiki kaya zote zilizo kwenye mpango wa TASAF kwa nchi nzima na katika zoezi hili hakutaongeza kaya mpya, kaya ambazo hazitafika kufanyiwa uhakiki, hazitalipwa” Alisema Ndg Shabani

Akisoma taarifa wakati wa ufunguzi kwa niaba ya Mkurugenzi Mtendaji wa TASAF Taifa Ndg. Ladislaus Mwamanga, Bwana. Shabani alisema kuwa utekelezaji wa kipindi cha kwanza cha TASAF awamu ya tatu umechangia kwa kiasi kikubwa azma ya Serikali kupunguza umaskini nchini kwani mahitaji ya msingi kwa Kaya yamepungua kwa asilimia 10 na umasikini uliokithiri umepungua kwa asilimia 12.

Aliongeza kuwa baada ya kukamilisha kipindi cha kwanza cha awamu ya tatu ya TASAF Serikali iliamua kuendelea  na kipindi cha pili ili kaya zote zinazoishi katika mazingira duni zipate usaidizi kwa kuwawezesha kufanya kazi na kupambana na umasikini.

“Kipindi hiki kitazifikia ya kaya 1,450,000 zenye jumla ya watu zaidi ya milioni 7 kote nchini ikiwa ni nyongeza ya kaya zaidi ya 350,000. Kutakuwa na miradi mbalimbali inayotekelezwa ikiwemo miradi ya Elimu, Afya na Maji”

“Itatengenezwa miradi ambayo itawalazimu walengwa waweze kufanya kazi ili waweze kupata kipato. Miradi hiyo itakuwa inatoa ajira za muda lengo likiwa mtu apate sababu ya kulipwa kwa kufanya kazi” alisema kwa Niaba ya Mkurugenzi Mtendaji wa Tasaf

Naye Kaimu Mkurugenzi Mtendaji wa Halmashauri ya Wilaya ya Mbarali Ndg. Aswege Kaminyoge, amemshukuru Rais wa Jamhuri ya Muungano wa Tanzania Mhe. Dkt. John Pombe Magufuli kwa kuanzisha Tasaf awamu ya 3 kwani itaziwezesha kaya nyingi kufanya kazi kwenye miradi itakayoibuliwa na kuweza kujipatia kipato, na kwa niaba ya Halmashauri wapo tayari kutekeleza miaradi yote itakayoletwa kwa asilimia 100.

Akiongezea mratibu wa Tasaf Wilaya ya Mbarali Ndg. Zabron Abel alisema kuwa, kwa kupitia mafunzo yaliyotolewa kwa mfumo wa kielectronic kwa wawezeshaji ngazi ya Wilaya wanatarajia watapita katika vijiji 75 vilivyopo kwenye mpango kuzihakiki kaya 10,317 kwa lengo la kuwa na data safi za walengwa, na ili waweze kuhakikiwa watalazimika kuja na kitambulisho cha Mpango, daftali la mototo kwa wale ambao wanasoma, namba ya simu, pamoja na namba ya Nida au kitambulisho cha mpiga kura.

Wakizungumza kwa nyakati tofauti wawezeshaji kwa njia ya mfumo kwenye mafunzo hayo, Bi. Helen Ngowo na Bwana. Edwin Mgendwa wameishukuru Serikali kwa kuleta TASAF awamu ya 3 sehemu 2 kwani awamu hii inatumia zaidi mfumo kwa kutumia Vishikwambi (Tablet) ambazo zitawasaidia kupata kaya zenye sifa zitakazostahili kuwepo kwenye mpango na itawezesha kuondoa walengwa hewa.

MWISHO