Atakaezidisha Ujazo wa Kilo 100 au Debe Saba za Mpunga Kwenye Gunia Akamatwe, Atozwe Faini - Mfune

Posted on: May 31st, 2018

Hayo yamesemwa na Mkuu wa Wilaya ya Mbarali Mhe. Reuben Mfune tarehe 31/05/2018 katika kata ya Madibira Kijiji cha Mahango Kitongoji cha Chalinze, Kwenye mkutano wa hadhara aliouitisha kwa ajili ya kuzungumza na kutoa elimu ya vipimo na ujazo wa magunia kwa wananchi wanaolima maeneo hayo.

Mhe. Mfune amewataka wananchi wote wa kata ya Madibira, Wilaya ya Mbarali pamoja na wafanyabiashara wote wa Mazao kufuata sheria zilizoweka ili kila mmoja aweze kunufaika, kwani hadi sasa kuna baadhi ya wafanyabiashara wanawaibia wakulima kwa kutumia magunia yenye ujazo usiokubalika kisheria.

 “Wale waliokuja na viroba vikubwa waviondoe, kuanzia kesho sitaki kuviona mashambani, na yeyote atakaekutwa na roba la zaidi ya debe saba au kazidisha ujazo wa kilo 100 akamatwe, agizo hili nalitoa kwa Wilaya nzima, nimeunda kikosi kazi kwa ajili ya kufuatilia maagizo yote niliyoyatoa” alisema

Akijibu hoja mbalimbali za wananchi wa maeneo hayo, Mhe. Mkuu wa Wilaya amewataka wananchi wa maeneo hayo kuunda utaratibu ambao utawasaidia wakulima kuwa na umoja unaofanana ili waweze kuongea lugha moja kwani hadi sasa hakuna bei elekezi ya zao la mpunga iliyotolewa, bei zilizopo zinategemeana na nguvu ya soko, kikubwa ni kutumia teknolojia walizonazo hasa simu za mikononi kuangalia bei iliyopo sokoni kwani bila kufanya hivyo watu wachache watawaumiza.

Akijibu kuhusu suala la mikopo, Mhe. Mfune ameahidi kufanya mazungumzo na taasisi za kifedha ili waje kutoa elimu na kwa wale watakaokidhi vigezo waweze kukopeshwa fedha zitakazowasaidia kuendesha shughuli zao za Kilimo.

Kuhusiana MAMCOS (Madibira Agriculture Marketing Co-operative Society)  Mhe. Mfune amesema kuwa, kuanzia msimu ujao na kuendelea ni lazima shirika hilo lifanye kazi yao ipasavyo ikiwemo kukopa mikopo kwenye taasisi za kifedha na kuwakopesha wakulima wanachama ili iweze kuwasaidia.

Akitoa elimu ya Vipimo katika mkutano huo, Meneja wa Wakala wa Vipimo Mkoa wa Mbeya Ndg. Richard Mbonabucha alisema kuwa, kipimo cha kilo kwa kutumia mizani ndio kipimo kinachojulikana Kitaifa na Kimataifa na sio kama ilivyozoeleka kwa baadhi ya wafanyabiashara kutumia ndonya.

Kuhusiana na zao la mpunga Ndg. Mbonabucha aliongeza kuwa, sheria ya sasa inaruhusu utaratibu wa kufunga mpunga kwa ujazo wa kilo 75 pindi mpunga unapotoka shambani, ukiwa umehifadhiwa katika maghala ya chakula au ukiwa unapelekwa sokoni, kukiuka kufanya hivyo unakuwa umevunja sheria.

Ndg. Mbonabucha aliongzea kuwa  kwa sasa tukiwa tunasubiri mchakato wa sheria kufanyiwa marekebisho na Bunge la Jamhuri ya Muungano wa Tanzania, ujazo uwe wa kilo 100 au debe saba za mpunga, kinyume na hapo hatua za kisheria zitachukuliwa pamoja na adhabu ya faini kuanzia shilingi laki 1(TZS 100,000/=) hadi milioni 50.

Naye Diwani wa Kata ya Madibira Mhe. Erick Ngelyama amewaomba wananchi wa kata hiyo kufuata sheria zilizopo na kufuata taratibu walizokubaliana ili kuepuka kapata hasara. Vilevile amewataka kusimama imara hasa wanavyoitana kwenye mikutano yao na MAMCOS pamoja na kuvunja makundi kwani mkuu wa Wilaya yupo kwa ajili ya maslahi ya wanamadibira na wananchi wote wa Mbarali kwa ujumla.