Baraza La Madiwani Mbarali Lawashusha Vyeo Watumishi Walevi

Posted on: July 19th, 2018

Baraza la Madiwani la Halmashauri ya Wilaya ya Mbarali, limewashusha vyeo watumishi watatu wa Idara ya Afya kutokana na makosa ya kulewa nyakati za saa za kazi na kusababisha kuto timiza majukumu yao ipasavyo.

Watumishi hao wameshushwa vyeo hivyo siku ya tarehe 18/07/2018 kwenye Kikao cha robo ya nne cha Baraza la Madiwani ambacho kiliitishwa kwa ajili ya kujadili mambo mbalimbali ya Maendeleo yanayoihusu Halmashauri ya Wilaya ya Mbarali.

Akizungumza katika Baraza hilo Makamu Mwenyekiti wa Halmashauri ya Wilaya ya Mbarali, Mhe. Broun Mwakibete alisema kuwa, pamoja na kuwashusha vyeo watumishi hao, Baraza la Madiwani litakuwa na jicho la karibu kuangalia kama watabadilika au hawatabadilika, na kama hawatabadilika watafukuzwa kazi.

Akizungumzia suala hilo, Mkurugenzi wa Halmashauri ya Wilaya ya Mbarali, Kivuma Msangi, alisema kuwa, kabla ya kufikia uamuzi huo, watumishi hao waliitwa na kupewa onyo kwa mdomo na baadae kuandikiwa barua lakini hawakubadilika.

Msangi aliongeza kuwa licha ya kuwapa onyo pia waliunda Tume ya kuchunguza suala hilo, ambapo walibaini na kuthibitisha watumishi hao kuingia kazini wakiwa tayari wamelewe kutoroka kazini nyakati za usiku kwenda kulewa.

“Tumewaadhibu watumishi hawa kwa kuwa kuwashusha vyeo na mishahara, lengo letu ni wabadilike lakini tukiona bado wanaendelea tutawafukuza kazi kabisa,” alisema.

Akitangaza uamuzi huo mbele ya kikao cha Baraza la Madiwani Afisa Utumishi wa Halmashauri ya Wilaya ya Mbarali Ndg.  Aswege Kaminyoge kwa niaba ya Mkurugenzi Mtendaji, aliwataja watumishi hao kuwa ni Elioth Msamila na Gervas Kasimbazi Mabibu daraja la kwanza hawa wanashuka kuwa  Matabibu daraja la pili, na mwingine ni Vocus Fedrick  Mhudumu wa Afya Hospitali anaenda kuwa Mhudumu wa Ofisi.

Kaminyoge aliongeza kuwa uamuzi wa kuwashusha vyeo umepewa Baraka na Baraza la Madiwani na kwamba watumishi hao mbali na kushushwa vyeo watapunguziwa mishahara yao.

Mwenyekiti wa Kamati ya Elimu, Afya na Maji ambaye ni Diwani wa Kata ya Miyombweni, Mhe. Mstaulo Sanzala alisema kuwa uamuzi huo uwe fundisho kwa watumishi wengine wanaoendekeza ulevi sehemu za kazi. Aliongeza kuwa endapo Kamati yake itapata taarifa na kuthibitisha kuwa kuna mtumishi ambaye anakunywa pombe mahali pa kazi watamchukulia hatua ikiwemo kushushwa cheo au kufukuzwa kazi bila kujali cheo wala umaarufu wake.

Katika Kikao hicho cha robo ya nne, Baraza la Madiwani lilijadili masuala mbalimbali ya Maendeleo yakiwamo, Mpango wa Motisha kwa Watumishi kwa mwaka 2018/2019-2020/2021, Mpango wa Kuondoa Biashara zinazofanyika kando kando ya barabara kuu ipitayo katika miji midogo ya Ilongo, Igurusi, Chimala na Igawa, Maombi ya Idhini ya Matumizi ya sh, 100,000,000.00 kwa ajili ya Ukamilishaji wa ukarabati wa kituo cha afya Utengule Usangu.

Ombi la kubadilisha Matumizi ya Soko la Igawa Kuwa Stendi ya Mabasi, Taarifa ya Shule ya Sekondari Rujewa kuto pewa wanafunzi wa kidato cha Tano mwaka 2018, Taarifa ya Idara ya Maji kuhamia Wizara ya Maji na Idara ya Ardhi na Maliasili kitengo cha Ardhi Kuhamia Wizara ya Ardhi, Nyumba na Maendeleo ya Makazi na Masuala ya kiutumishi ikiwemo Uteuzi wa Wakuu wa Idara, mapendekezo ya kukaimu nafasi za ukuu wa Idara pamoja na masuala ya kinidhamu.