CHF Iliyoboreshwa Inalinda Heshima ya Familia-Mfune

Posted on: June 3rd, 2020

Mkuu wa wilaya ya Mbarali Mhe. Reuben Mfune amewataka wakazi wote wa Wilaya ya Mbarali ambao hawajajiunga na Mfuko wa Bima ya Afya ya Jamii iliyoboreshwa, kujiunga na mfuko huo ili kuwa na uhakika wa kupatiwa huduma za matibabu mara watakapougua kwani mfuko huo umekuwa ukilindia heshima katika familia hata kama huna pesa ya matibabu kwa wewe na familia yako.

Mhe. Mfune ameyasema hayo siku ya tarehe 02/06/2020 kwenye muendelezo wa ziara zake za kuhamasisha wananchi kujiunga na Mfuko wa Bima ya Afya ya Jamii iliyoboreshwa (ICHF) katika kata za Rujewa, Ihahi na Chimala ambapo katika ziara hiyo aliweza kuongea na Wah. Madiwani, Wenyeviti wa Vijiji pamoja na Vitongoji.

“Tanzania ya Jana sio ya leo, watu wengi wanailalamikia CHF ya zamani, zile changamoto zilizokuwepo kwenye CHF iliyopita, Serikali imezifanyia maboresho ili iwe na faida kubwa kwa jamii. Kwa sasa CHF iliyoboreshwa (ICHF) inakuruhusu kutibiwa kuanzia ngazi ya Zahanati, Kituo cha Afya, Hospitali ya Wilaya hadi Hospitali ya Rufaa ya  Mkoa popote pale ndani ya Tanzania.”

“Shilingi 30,000 inauwezo wa kuhudumia familia ya watu 6 ambapo ni sawa na shilingi 5,000 kwa mtu mmoja kwa mwaka na kwa upande wa wanafunzi wanuwezo wa kujichangisha watu 5 na wakapata huduma bila tabu yeyote.”Alisema Mfune.

Mkuu wa Wilaya amewaagiza wenyeviti hao kuonesha mfano kwa jamii kwa kukata bima ya ICHF kwani kwa viongozi hao sio ombi ni lazima ili watakavyokuwa wanatoa elimu kwa wananchi wawe na mifano halisia.

Mhe Mfune amewata wananchi kutoa taarifa kwa viongozi wao pale wanapoona kuna ubaguzi wa utoaji huduma ya afya ili waweze kuwachukulia hatua watumishi wanaofanya hivyo.

Mkuu wa Wilaya ya Mbarali alianza ziara ya kupita kila kata na kutoa elimu kuhusiana na CHF iliyoboreshwa (ICHF) siku ya terehe 01/06/2020. hadi sasa ameshapita kata za Mwatenga, Ruiwa, Mahongole, Kongoro, Utengule Usangu, Igurusi, Itamboleo, Chimala, Ihahi pamoja na Rujewa, na ataendelea na ziara hiyo siku ya ijumaa ya tarehe 05/06/2020 ili kumalizia kata zilizobaki.

MWISHO