DAS SICHALWE AMALIZA MGOGORO WA ARDHI ZAIDI YA EKARI 800 KATA YA LUHANGA, MBARALI.

Posted on: January 22nd, 2026

Katibu Tawala Wilaya ya Mbarali, Ndugu Frank Mastara Sichalwe amefanikiwa kumaliza mgogoro wa ardhi Kata ya Luhanga Wilayani humo baada ya kuwakutanisha wananchi na Viongozi wa Kata hiyo na kujadiliana juu ya mgawanyo wa ardhi hiyo utakaosaidia kutatua changamoto ya malalamiko ya baadhi ya Wanakijiji kukosa maeneo ya kufanyia shughuli za kilimo na ufugaji.

Katibu Tawala Sichalwe alimuwakilisha Mkuu wa Wilaya ya Mbarali, Mhe. Brigedia Jenerali Maulid Hassan Surumbu katika mkutano uliofanyika Januari 21, 2026 akiwa ameongozana na Wajumbe wa Kamati ya Usalama ya Wilaya hiyo ambapo wananchi hao walitoa kero ya kukosa ardhi ya kilimo huku wengine wakimiliki zaidi ya ekari 200 ambazo hazikuwa na ufafanuzi jinsi alivyozipata, jambo lililoleta mkanganyiko kwa wananchi hao.

“Hizi ekari 800 za ardhi fanyeni tathmini na uhakiki, wanaoikidhi vigezo wagawieni kidogokidogo walime angalau wapate chakula, vijana wanalalamika hawana maeneo ya kulima”, amesema Katibu Tawala Sichalwe.

Aidha ziara hiyo imefanikiwa kumaliza mgogoro huo uliodumu kwa muda mrefu kuhusu mgawanyo wa ardhi ambapo mwananchi mmoja alilalamikiwa kumiliki eneo la takribani ekari 800 na kuweka mipaka kinyume na utaratibu huku Serikali ya Kijiji ikilalamikiwa kutomchukulia hatua hali iliyopelekea wananchi kupeleka malalamiko yao ngazi mbalimbali na hatimaye Mkuu wa Wilaya hiyo, Brig. Jen. Maulid Surumbu kumuagiza Katibu Tawala, Frank Mastara Sichalwe kumuwakilisha katika kulitafutia ufumbuzi wa haraka ili wananchi warejee katika shughuli zao za kilimo kwa wakati muafaka.

Katika Mkutano huo, Katibu Tawala Sichalwe amewataka viongozi wa ngazi za Vijiji na Kata kuhakikisha wanatatua kero na changamoto za wananchi haraka na kwa mujibu wa Sheria na pia kujiepusha na kujihusisha na vitendo ambavyo vinapelekea wao kuwa sehemu ya migogoro badala ya kuwa watatuzi