DC amaliza Mgogoro wa Mpaka kati ya Mtamba na Uturo uliodumu miaka 11

Posted on: March 8th, 2019

Mkuu wa Wilaya ya Mbarali Mhe Reuben Mfune, amehitimisha mgogoro wa mpaka uliodumu takribani kwa muda wa miaka 11 kati ya kijiji cha Uturo na Kijiji cha Mtamba vilivyopo kata ya Mapogoro wilayani hapa.

Mkuu wa Wilaya amemaliza mgogoro huo siku ya tarehe 07/03/2019 alipoitisha mkutano wa hadhara na wananchi wa vijiji hivyo viwili kwa ajili ya kuwasikiliza na kufikia hitimisho kwani kwa kipindi kirefu wamekuwa wakiishi bila ya maelewano.

Katika kumaliza mgogoro huo, Mhe. Mfune alisema kwamba, kwa kuwa kila upande unaendelea kushikilia msimamowake, maamuzi yake ya mwisho ya kumaliza ni kuwa eneo linalobishiwa litagawanywa lakini mgawanyo wake hautakuwa kama wengine walivyopendekeza.

kijiji cha uturo kitaishia eneo linaloitwa kwa maboga na kijiji cha Mtamba kitaishia eneo linaloitwa kwa Mpendwa upande mwingine wa barabara.

“haiwezekani tukaendelea kubishana kuhusu jambo moja miaka yote, na tunakaacha kufanya shughuli za maendeleo tunakuja kushinda hapa kwa ajili ya jambo moja. Wote hapa nyie ni ndugu halafu mnaleta migogoro isiyo na tija” alisema Mhe Mfune

Kaimu Mkurugenzi Mtendaji wa Halmashauri ya Wilaya ya Mbarali Ndg. Aswege Kaminyoge, alisema kuwa, kwa mujibu wa sheria Mamlaka yenye mapendekezo ya kugawa eneo ndani ya kijiji ili kiweze kugawanyika ni mkutano mkuu wa kijiji husika, baada ya hapo unaandaliwa muhtasali ambao unapelekwa halmashauri, na mara baada ya muhtasari huo kukubaliwa, unapelekwa kwa Waziri mwenye dhamana ili aweze kugawa vijiji.

Baadhi ya wananchi waliohudhuria mkutano huo, walimshukuru Mkuu wa Wilaya ya Mbarali kwa kutatua mgogoro uliodumu kwa muda mrefu kwani ulikuwa unawakwamisha kufanya shughuli zao za maendeleo kama ujenzi wa vyumba vya madarasa na zahanati.

Kijiji cha Uturo kiligawanyika mwaka 2009 na kuzaliwa vijiji vitatu, Kijiji cha Uturo, Kijiji cha Mtamba na Kijiji cha Ukwama.

Mgogoro kati ya Kijiji cha Uturo na Kijiji cha Mtamba ulianza mwaka 2009 mara baada ya uchaguzi wa Serikali za Mitaa wakati wa ugawanyaji wa mali ambapo halmashauri ya vijiji vitatu Kijiji cha Uturo, Ukwama na Mtamba viliketi vikiwa na ajenda ya kugawanya mali za vijiji pamoja na kuoneshana mipaka kitu kilichopelekea vijiji vya Uturo na Mtamba kutofikia muafaka.

Eneo lililokuwa linagombaniwa ni kitongoji cha kilambo ambapo kila kijiji kiliingia zaidi kwa mwingine kwenye eneo lenye upana wa mita 260.

MWISHO