DC amshukuru Mdau wa Maendeleo kwa Kuguswa na Uhaba wa Madawati

Posted on: February 18th, 2019

Mkuu wa Wilaya ya Mbarali Mhe. Rauben Mfune amemshukuru Ndg. Leopord Mwadembe kwa kuchangia viti pamoja na meza 10 zenye thamani ya shiling 500,000 kwa ajili ya kusaidia kupunguza uhaba wa Viti na Meza kwa wanafunzi wa kidato cha kwanza katika shule za sekondari wilayani hapa.

Mhe. Mfune amezitoa shukrani hizo siki ya jumatatu ya tarehe 18/02/2019 katika Karakana ya magali ya Halmashauri ya Wilaya ya Mbarali iliyopo makao makuu ya Halmashauri alipokuwa akikabidhiwa madawati hayo ili yakasaidie baadhi ya shule zenye uhaba mkubwa.

Akizungumza katika makabidhiano hayo alisema kuwa amewaandikia barua pamoja na kuwaomba wadau mbalimbali wa maendeleo wilayani hapa ili waweze kusaidia upungufu wa viti na meza 4,616 kwani kwa mwaka jana 2018 kulitokea ongezeko kubwa la ufaulu wa wanafnzi wa darasa la saba tofauti na miaka nyuma.

“Tumewataarifu wananchi wote ambao shule zao zina upungufu wa viti na meza, vilevile tumewaomba wadau mbalimbali wa maendeleo kutuchangia, tunamshukuru Ndg. Mwadembe kwa kuguswa na uhaba huu na kuamua kutuchangia viti pamoja na meza 10 vyenye thamani ya shilingi laki tano (500,000).”

“Nawaomba na wadau wengine ambao wamepokea wito na ambao hawajapokea wito, tunawakaribisha waweze kutuchangia madawati ili watoto wetu waweze kusoma katika mazingira mazuri.”

Naye Ndg. Leopord Mwadembe Mdau wa maendeleo anaetokea Kata ya Ubaruku  Wilaya ya Mbarali amewasihi wadau wengine wa maendeleo kuchangia madawati kama alivyofanya yeye, kwani watoto hawana sehemu ya kusemea, na kama mtu hana pesa bora akachangia hata nguvu kazi kusaidia ujenzi wa vyumba vya madarasa unaoendelea.

“Hakuna mtu ambaye hana mtoto anayesoma sekondari, kama sio wa kwako kabisa basi ni wa ndugu yako, rafiki yako au jirani yako, na hatuwezi kuitegemea serikali peke yake ikafanya kila kitu, napenda kuonyesha hisia zangu kwa vitendo na kusonga mbele”

Ndg. Mwadembe aliongeza kuwa kuna fedha ambazo anaidai skimu ya umwagiliaji ya Mwenda Mtitu iliyopo wilayani hapa kiasi cha shilingi 8,500,000/=  ambazo alifanya kazi ya kutengeneza mfereji, kati ya fedha hizo kiasi cha shilingi 3,500,000/= zikatwe kama mchango wake mwingine katika kuchangia upungufu wa madawati.

Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi alisema kwamba anawapenda wadau kama hawa wa maendeleo ambao hawana itikadi za kisiasa katika masuala ya maendeleo, ofisi yake kwa kushirikiana na ofisi ya Mkuu wa Wilaya wanapokea mchango wowote ule, uwe mchango wa fedha au dawati hata kama likiwa moja kwani kwa sasa kuna uhitaji mkubwa sana wa viti pamoja na meza.

MWISHO