DC arudisha Ekali 290 za Ardhi Matebete.

Posted on: December 12th, 2019

Mkuu wa Wilaya ya Mbarali Mhe. Reuben Mfune, amerudisha ekali 290 za ardhi zilizoporwa na wajanja wachache kwa kughushi nyaraka za Serikali katika Kijiji cha Matebete Wilaya ya Mbarali.

Mhe. Mfune ametoa uamuzi huo wa kurudisha ekali hizo siku ya tarehe 11/12/2019 alipofanya mkutano na wananchi wa kijiji cha Matebete kilichopo kata ya Itambolea alipokuwa akipokea ripoti ya tume aliyoiunda kwa ajili ya kuchunguza mgogoro wa ardhi katika kijiji hicho.

Mkuu wa Wilaya ameamuru kukamatwa kwa watu waliohusika na uporwaji huo wa mashamba ambao ni Bw. Karashi Tisho (Mfugaji), pamoja na watendaji wawili wa vijiji wanaotuhumiwa kutumia vibaya madaraka yao ambao ni Saturo Kereyenye na Raphael Daimon Molel.

Mkuu wa Wilaya ametoa siku mbili kwa Serikali mpya ya Kijiji kusimamia ugawaji wa ardhi kwa watu wote waliozulumiwa mashamba yao, na kwa yule aliegushi nyaraka na kujipatia ekali 300 apewe ekali 10 ambazo alipewa kwa mujibu wa sheria.