DC Atoa Maelekezo Kumaliza Mgogoro wa Wafugaji na Hifadhi ya Taifa Ruaha

Posted on: March 27th, 2019

Mkuu wa Wilaya ya Mbarali Mhe. Reuben Mfune amewataka wafugaji wote wa Wilaya ya Mbarali pamoja na uongozi wa Hifadhi ya Taifa ya Ruaha (RUNAPA) kumaliza mivutano iliyopo baina yao kuhusiana na mifugo kukamatwa ikidaiwa ipo ndani ya Mpaka wa Hifadhi.

Mhe. Mfune ameyasema hayo siku ya jumanne ya tarehe 26/03/2019 alipoitisha kikao cha pamoja Kati ya Viongozi wa Wafugaji, Wafugaji wanaopakana na hifadhi, Viongozi wa RUNAPA, Mwenyekiti wa CCM Wilaya ya Mbarali, Waheshimiwa Madiwani, Watendaji wa Kata na baadhi ya Wataalam wa Halmashauri  katika ukumbi wa ofisi ya Mkuu wa Wilaya.

 “Inaonyesha wengi wetu hapa hatuujui vizuri mpaka wa Hifadhi ya Taifa ya Ruaha, nasitisha kwa muda zoezi la ukamataji mifugo kuanzi siku ya jumanne ya tarehe 26/03/2019 hadi siku ya jumatatu ya tarehe 01/04/2019 kwa lengo la kwenda kuoneshana mpaka. Nawaombemi wafugaji msitumie fursa hii vibaya kupeleka mifugo ndani ya Hifadhi”

“Tutashiriki wote, wakiwemo Waheshimiwa Madiwani, Watendaji wa Kata na Vijiji husika, viongozi wa wafugaji, wafugaji wa maeneo hayo, viongozi wa RUNAPA pamoja na Askari wao, mimi mwenyewe,  Kamati ya Ulinzi na Usalama Wilaya pamoja na baadhi ya Wataalamu.”* Alisema 

Mkuu wa Wilaya aliongeza kuwa mara baada ya kuonyeshana mipaka, yeyote atakaebainika kukiuka makubaliano hayo atachukuliwa  hatua kali za kisheria ili kukomesha tabia ya kuingiza mifugo hifadhini.

“Hili litakuwa ni suluhisho la muda tukiwa tunasubili utekelezaji wa agizo la Rais wa Jamhuri ya Muungano wa Tanzania Mh. John Pombe Magufuli  la kubadilisha sheria ili kupata suluhisho la kudumu.“

Mhe. Mfune aliongeza kuwa misingi wa kuongeza Hifadhi ya Taifa ya Ruaha (RUNAPA) sio kwa ajili ya wanyama,  bali ni kwa ajili ya uhifadhi wa maji yanayokwenda hifadhini pamoja na kwenye mabwawa ya kuzalisha umeme ya Mtera, Kidatu na sasa Rufiji.

Mwenyekiti wa Chama Cha Mapinduzi (CCM) Wilaya ya Mbarali Ndg. Hashimu Msese Mwalyawa alisema kuwa busara itumike katika kutatua mgogoro uliopo kati ya wafugaji na RUNAPA kwani pande zote mbili zinatakiwa kutatua matatizo yao na sio kuviziana. Vilevile ameuomba uongozi wa RUNAPA kuchimba malambo ya kunyweshea mifugo ili kuendelea kutatua ugomvi wa maji uliopo.

Baadhi ya wajumbe waliohudhuria kikao hicho walisema kuwa, kuna baadhi ya wafugaji ni wakorofi na wanakwenda kuchungia mifugo yao ndani ya hifadhi na pia kuna baadhi ya wafugaji sio wakorofi. Vilevile hata kwa upande wa Askari wa RUNAPA kuna baadhi yao wanasema ukweli na wengine hawasemi ukweli pindi wanapokamata mifugo.

Wajumbe walifurahia ufumbuzi huo wa muda wa utambuzi wa mpaka ambao utaanza kutekelezwa kuanzia tarehe 02/04/2019 na utafanyika kwa muda siku tatu.

MWISHO