DED MWELI AREJESHA UHAI WA MAMLAKA YA MJI MDOGO RUJEWA, MBARALI.

Posted on: December 22nd, 2025

Mkurugenzi Mtendaji wa Halmashauri ya Wilaya ya Mbarali, Ndugu Raymond Mweli amerejesha uhai wa Mamlaka ya Mji Mdogo Rujewa kwa kufanya Kikao kazi na Wajumbe wa Mamlaka ya Mji Mdogo Rujewa ambapo ameagiza kuanza kwa vikao vya Mamlaka ya Mji Mdogo Rujewa Halmashauri ya Wilaya ya Mbarali ambavyo vilikua vimesimama toka mwaka 2024.

Akizungumza na Wajumbe hao ambao ni Wenyeviti wa Vitongoji vinavyounda Mamlaka ya Mji Mdogo Rujewa, Mkurugenzi Mweli amewataka kufanya kazi kwa kufuata Sheria, Kanuni, Miongozo na Taratibu katika kutekeleza majukumu yao kama wajumbe wa Mji Mdogo Rujewa.

"Sisi kama Halmashauri tutaandaa mwongozo utakaowaongoza nyinyi kama Wenyeviti wa Vitongoji utakaoeleza bayana majukumu yenu, ninaagiza kuanza mara moja kwa Vikao vya Mamlaka ya Mji Mdogo Rujewa ambavyo vilikua vimesimama kwa kipindi kirefu. Tukajikite katika kuwatumikia wananchi bila upendeleo wala ubaguzi sababu wao ndio wametuweka hapo, tutatue kero zao na tusimamie miradi iliyopo kwenye Vitongoji vyetu", amesema Mkurugenzi Mweli. 

Sanjari na hilo Mkurugenzi Mweli amewataka Wajumbe hao kuhakikisha wanasimamia ukusanyaji wa mapato ya Halmashauri kwenye eneo la Mji Mdogo Rujewa ili Mamlaka iweze kujiendesha yenyewe.

Kwa upande wao Wajumbe wa Mamlaka ya Mji Mdogo Rujewa wakiongozwa na Mwenyekiti wa Mamlaka ya Mji Mdogo Rujewa, Mheshimiwa Chameta Shaibu Godigodi na Mtendaji wa Mamlaka hiyo, Ndugu Tuntufye Chamba wamemshukuru Mkurugenzi Mweli kwa kuwakumbusha umuhimu na kuandaa Kikao kazi hicho ili kurejesha uhai wa Mamlaka ya Mji Mdogo Rujewa.