Kuna kazi nyingi sana za maendeleo ambazo zinatakiwa kufanywa- Kilemile

Posted on: August 2nd, 2018

WENYEVITI wa vitongoji Wilayani Mbarali mkoani Mbeya wametakiwa kuachana na masuala ya siasa ambayo kwa kiasi kikubwa yamekuwa yakipewa kipaumbele zaidi badala ya shughuli za maendeleo ambazo zinatakiwa kufanywa .

Hayo yamesemwa juzi na Katibu Tawala wa Wilaya ya Mbarali ,Ezekieh Kilemile wakati akifunga mkutano wa baraza la mamlaka ya Mji mdogo Rujewa wilayani humo ambacho pia kilikuwa na uchaguzi wa mwenyekiti wa Mamlaka na makamu mwenyekiti pamoja na wenyeviti wa kamati.

Kilemile alisema kuwa kata ya Rujewa imekuwa ikijali zaidi suala la siasa huku shughuli za maendeleo ambazo zinatakiwa kufanywa kuendelea kusimama.

”Kuna kazi nyingi sana za maendeleo ambazo zinatakiwa kufanywa mfano ni ujenzi wa vyumba vya madarasa ambavyo havijakamilika hebu huo muda tutumie kukamilisha ujenzi wa vyumba hivi badala ya hizi siasa “alisema Katibu Tawala huyo.

Aidha Katibu Tawala huyo aliwataka wenyeviti wa vitongoji kuwapa ushirikiano madiwani wakati wa kusimamia shughuli za maendeleo katika maeneo yao.

Akizungumzia kuhusu misaada kutoka kwa wadau wa maendeleo Kilemile aliwataka viongozi kutopenda misaada kwani watakosa uhuru hivyo ni vema kuhamasisha wananchi kuchangia maendeleo badala ya kukaa kusubiri misaada wakati wananchi wana uwezo wa kufanya kazi na kuchangia.

“Nimekuwa nikijiuliza sana nyie viongozi kuogopa kuwaeleza wananchi juu ya uchangiaji wa maendeleo kisa tu mnasubiri misaada na kuwaacha wananchi wakati nao wanawajibu wa kuchangia maendeleo.

Hata hivyo Katibu Tawala huyo alisema Kata ya Rujewa inadaiwa vyumba vya madarasa sita ambavyo havijakamilika mpaka sasa changamoto kubwa ni kutowashirikisha wananchi kwa kigezo cha kusubiri misaada na tatizo kubwa lipo kwenye Kata ya Rujewa.

Kwa upande wake Mkurugenzi Mtendaji wa Halmashauri ya Wilaya ya Mbarali , Kivuma Msangi alisema kila mwenyekiti wa kitongoji asimamie shughuli za maendeleo kwenye eneo lake kwa kushirikiana na wananchi .

Aidha Kivuma aliwataka wenyeviti kuwapa ushirikiano watumishi katika suala zima zima la uhamasishaji wa shughuli za maendeleo ili uweze kusonga mbele zaidi.