Magonjwa Mengi Yanasababishwa na Uzembe wa Kutofanya Mazoezi – Mfune

Posted on: November 25th, 2018

Hayo yamesemwa na Mkuu wa wilaya ya Mbarali Mhe. Reuben Mfune siku ya tarehe 24/11/2018 alipokuwa akifungua mashindano mbalimbali ya Bonanza aliyoyaandaa kwa ajili ya kuwakutanisha Watumishi wa Sekta za Umma na Sekta Binasfi.

Mhe. Mfune amewataka wananchi wote wa Wilaya ya Mbarali kujenga utamaduni wa kufanya mazoezi kila mara, sio kusubili hadi watakapopatwa na magonjwa au kushauriwa na daktari.

“Mazoezi sio lazima kukimbia, hata ukitembea mwendo wa haraka kwa muda wa nusu saa na ukatokwa na jasho, inatosha kwa siku. Sehemu ambazo unaweza kutembea kwa miguu ni vyema ukafanya hivyo kuliko kutumia vyombo vya usafiri”

Mkuu wa Wilaya ametoa maelekezo kwa kata zote pamoja na vijiji vilivopo ndani ya Wilaya ya Mbarali kuweka utaratibu wa kufanya mazoezi ya pamoja kwa kila siku za jumamosi sambamba na kuundwa kwa club mbalimbali za jogging, vilevile amazitaka shule zote kuwawekea wanafunzi utaratibu wa kufanya mazoezi kila siku kabla ya kuanza kwa masomo.

Kuhusiana na suala la Uchangiaji wa damu pamoja na upimaji wa virusi vya ukimwa ambapo zoezi hilo lilikuwa linaendelea uwanjani hapo, Mhe Mfune amewataka wananchi kuendelea kujitokeza kwa wingi kuchangia damu ili ziweze kuokoa maisha ya wengi kwani hakuna kiwanda cha damu, damu inatoka kwa binadamu. Utafiti wa kisayansi bado haujathibitisha kuchukua damu ya mnyama na kumuongezea binadamu, hivyo amewataka wananchi kujitokeza kwa wingi kuchangia damu ili kuokoa maisha yawengine.

“Tunapoambiwa Mume na Mke ni mwili mmoja, sio kwamba mnalingana damu, kila mmoja ana damu yake, tujitokeze kwa wingi ili tuweze kujua afya zetu”.

Baadhi ya watumishi waliohudhuruia Bonanza hilo, wamemuomba Mkuu wa Wilaya kufikilia kuweka utaratibu wa kufanyika kwa Mabonanza kama haya walau mara 4 kwa mwaka.

Lengo la kuandaa bonanza lilikuwa ni kuwakutanisha Watumishi kutoka Taasisi za Umma pamoja na Sekta binafsi  ili waweze kufahamiana, kubadilishana mawazo pamoja na kupata burudani. Michezo iliyokuwepo uwanjani hapo ni pamoja na Matembezi ya pamoja kutoka Ofisi ya Mkuu wa Wilaya hadi viwaja vya shule ya msingi Ibara umbali wa km 3.5, Mpira wa Miguu, Netball, Mpira wa Wavu na maonyesho ya baiskeli.