MBARALI YAKABIDHI MWENGE WA UHURU KATIKA HALMASHAURI YA WILAYA YA MBEYA, YAPONGEZWA KWA USIMAMIZI WA MIRADI

Posted on: October 9th, 2025

Ujumbe wa mbio za Mwenge wa Uhuru ukiongozwa na Kiongozi wa mbio hizo, Ndugu Ismail Ali Ussi umeonesha kuridhishwa kwa kiasi kikubwa na namna Halmashauri ya Wilaya hiyo inavyosimamia utekelezaji wa miradi mbalimbali ya maendeleo iliyopo katika Halmashauri hiyo.

Wakiongea wakati wa kuukabidhi mwenge wa Uhuru katika eneo la Inyala Jijini Mbeya,, ujumbe wa mbio za Mwenge umepongeza pia jitihada za Halmashauri hiyo katika kushirikiana nao na  kuwainua wananchi kiuchumi kupitia programu mbalimbali ikiwemo ya utoaji wa mikopo na elimu kwa vikundi vya wajasiriamali.

Kwa upande wake Mkuu wa Wilaya ya Mbarali, Brigedia Jenerali Maulid H.Surumbu  ameshukuru uongozi wa mbio hizo kwa kazi nzuri ya kizalendo wanayoifanya hasa kuufikisha ujumbe wa mbio hizo unaohamasisha wananchi kujitokeza kushiriki uchaguzi mkuu unaotarajiwa kufanyika Oktoba 29, 2025 kwa uhuru na amani.

Mwenge wa Uhuru uliwasili Halmashauri ya Wilaya ya Mbarali Oktoba 08,2025 na kufanikiwa kutembelea jumla ya miradi sita yenye thamani ya Bilioni 6.3 ikiwemo ya miundombinu ya Hospital ya Wilaya, barabara, mradi wa maji na vibanda vya biashara na hatimaye kukabidhiwa kwa uongozi wa Halmashauri ya Wilaya ya Mbeya Oktoba 09, 2025 kwa ajili ya kuendelea na ziara za kutembelea, kufungua na kuweka mawe ya msingi kwenye miradi ya Halmashauri hiyo ambapo kilele cha mbio hizo kinatarajiwa kuwa Oktoba 14, 2025 Jijini Mbeya.