Misitu Ni Uhai, Tuitunze Na Kuilinda- Mnangwone

Posted on: March 4th, 2020

Hayo yamesemwa na Wakala wa Huduma za Misitu Tanzania (TFS) kutoka Mkoa wa Mbeya Ndg Joseph Mnangwone alipokuwa akitoa elimu ya Uhifadhi wa Misitu kwenye vijiji vya Iheha, Nyamakuyu na Chalisuka vilivyopo Kata ya Madibira siku tarehe 04/03/2020 alipokuwa akiwasilisha mada kwa wananchi ambapo Tume maalumu imeundwa kwa ajili ya kutoa elimu kwa wananchi wanaoishi pembezoni mwa Hifadhi za Taifa kuhusiana na Uhifadhi wa Wanyama pori, Uhifadhi wa Misitu, utunzwanji wa Mazingira, matumizi bora ya ardhi pamoja na mbinu bora za Kilimo na Ufugaji.

Ndg. Mnangwone alimeama kwamba misitu inaharibiwa na shughuli za kibinadamu na kusababisha madhara makubwa ikiwamo mabadiliko ya hali ya hewa kama ongezeko la joto, ukame, ukosefu wa mvua na maafuriko, mmongonyoko wa ardhi pamoja udongo kupoteza rutuba.

“Tukiiharibu hii Tanzania hatutakuwa na sehemu nyingine ya kuishi, misitu ni uhaii, tuitunze misitu na kuilinda. Wewe hapo ulipo unapumua hewa chafu, hewa hiyo chafu inachukuliwa miti, na miti inatengeneza hewa safi, kwa hiyo tunapoharibu misitu inamaana tunakaribisha hewa chafu ambayo itatuletea magongwa kwa namna nyingine.”

Muikolojia kutoka Hifadhi ya Taifa ya Tanzania (TANAPA) Ndg. Daniel Mathayo alisema kuwa, kwa sasa Tanzania ina Hifadhi 22 zinahudumiwa na TANAPA. Hifadhi zote hizo ni mali za wananchi kwani faida zinazopatikana zinahudumia wananchi katika nyanja mbalimbali kama kujenga Hospitali, Zahanati Barabara, Shule na miundombinu mingine.

Aliongeza kuwa ni kosa kisheia kuchoma moto ndani ya Hifadhi, kuingiza mifugo kwenye eneo la Hifadhi, kuvuna mazao ya miti, kuwinda wanyama pori na shughuli zingine za kibinadamu ndani ya Hifadhi, na ikitokea mtu amekiuka atachukuliwa hatua kwa mujibu wa sheria zilizopo.

Naye Afisa Mipango Miji Kutoka Ofisi ya Mkuu wa Mkoa wa Mbeya Ndg. Enock Kyando alisema kwamba unapozungumzia umiliki wa ardhi, unajumuisha vitu vyote vilivyo juu yake kama nyumba, miti, mashamba na vinginevyo, ila vitu vyote vilivyo chini ya ardhi kama mafuta, gesi na madini, hivyo vyote ni mali ya Serikali.

Diwani wa Kata ya Madibira Mhe. Elick Ngoliama alisema kwamba wananchi wanaupenda sana uhifadhi kwani umewasaidia kutengeneza miundombinu mingi ya kijamii ikiwemo ujenzi wa vyumba vya madarasa kwenye vijiji 3 pamoja na zahanati vijiji 2 na amezishukuru timu zote za ulelimishaji zilizofika katika kata yake kutoa elimu ya uhifadhi kwani elimu hiyo itawasaidia kuepuka kuvunja sharia kwenye maeneo ya uhifadhi.

MWISHO