Mkuu wa Wilaya asimamisha Shughuli za Ujenzi Zinazoendelea Eneo la Mnada wa Madibira

Posted on: February 19th, 2020

Mkuu wa Wilaya ya Mbarali Mhe. Reuben Mfune, amesimamisha shuguli zote za ujenzi zinazofanywa na Ndg. Charles Mohele kwenye eneo la mnada uliopo kwenye kijiji cha Chalisuka kata ya Madibira ili kupisha uchunguzi wa mgogoro wa umilikishwaji wa eneo hilo kati ya Kijiji cha Chalisuka na Ndg. Charles Mohele.

Mhe. Mfune amesimamisha shughuli hizo siku ya tarehe 19/02/2020 alipokuwa kwenye ziara ya ukaguzi wa shughuli mbalimbali za maendeleo pamoja na kusikiliza mgogolo wa eneo hilo ambalo umiliki wake una utata kutokana na kukosekana kwa baadhi ya nyaraka.

“Ninakwenda kuunda tume ya uchunguzi ambayo itajumuisha Mwanasheria, Afisa Ardhi, Afisa Utumishi wa Halmashauri na Afisa Tawala kutoka ofisini kwangu. Nitawapa maelekezo ya kufanya kazi hii kwa siku 14. Moja ya kazi nitakazowaelekeza ni pamoja na kupitia taarifa zilizopo, mihtasari ya Serikali ya Kijiji na mkutano mkuu wa kijiji, pamoja na kuhoji watu mbalimbali waliokuwepo kipindi hicho na nitakuja hapa hapa kutoa matokeo ya huo uchunguzi”

“Ninachokitaka ni kwamba, tusimuonee bwana Mohele. Kama Bwana Mohele atakuwa anastahili nitasema anastahili, na kama atakuwa hastahili nitasema hastahili, na kama kuna marekebisho ya kufanya tutafanya marekebisho. Mimi nipo hapa kusimamia shughuli zote katika Wilaya”