Mtega Amaliza Mgogoro wa Diwani na Wenyeviti Mbarali.

Posted on: July 6th, 2019

Mwenyekiti wa Halmashauri ya Wilaya ya Mbarali Mhe. Francis Mtega (Diwani), amemaliza mgogoro uliodumu kwa muda mrefu kati ya Diwani wa Kata ya Madibira Mhe. Erick M. Ngelyama  (CHADEMA) na wenyeviti 7 wa vijiji vya kata hiyo (CCM) kupitia kikao cha Maendeleo ya Kata (WDC) kilichofanyika siku ya tarehe 05/07/2019 kwenye ukumbi wa ofisi ya kata.

Wenyeviti hao wa Vijiji saba walikuwa wanamtuhumu Diwani wa kata yao kutumia lugha ya kuwadhihaki kwenye mikutano ya hadhara aliyoifanya katika vijiji vyao kitu ambacho kilipelekea wenyeviti hao kuamua kuacha kufanya kazi na Diwani huyo.

Akizungumza katika kikao hicho Mhe. Mtega alisema kuwa, Baraza la Madiwani la Halmashauri ya Wilaya ya Mbarali limemtuma kwenda kujua ni kwanini vikao vya kisheria vya Maendeleo ya Kata (WDC) havifanyiki katika kata ya Madibira kwani ni kwa kipindi kirefu sasa Baraza halijapokea taarifa ya Maendeleo ya Kata.

“Kama vikao vya kisheria havifanyiki, ni athari kwa maendeleo ya kata pamoja na Taifa kwa ujumla. Kukosea kwa binadamu ni kawaida, ila sifa kubwa ya kiongozi ni kutambua unayoyafanya kama ni mazuri au ni mabaya, vilevile unavyokumbushwa na wenzio ni vyema kuyatafakari, kuyakubali na kuyafanyia maamuzi.”

“Leo iwe mwanzo mpya kwa siku zinazoendelea, migogoro haina faida zaidi ya kuchafua sifa ya kata yetu ya Madibira, Halmashauri na Mkoa wetu wa mbeya.”

“Binadamu wote tuna mapungufu, kikubwa ni kuvumiliana, sitarajii kusikia kitu kama hiki kinajirudia, natarajia tuliyoafikiana hapa yatafanyiwa kazi na sisi tunasubili matokeo.” Alisema

Diwani wa Kata ya Madibira Mhe. Erick M.  Ngelyama alikili kosa la kutumia lugha isiyofaa kwa Wenyeviti wake wa vijiji kupitia mikutano ya hadhara na kuomba asamehewe kwa maneno aliyoyatoa ambayo yaliwagawa katika safu yao ya uongozi.

Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi amewaomba wenyeviti wote wa vijiji kutoa ushirikiano kwani ni vigumu kufanya kazi kama unakinzana na wenzio.

Amewashukuru wenyeviti hao kwa kukubali kusamehe kwani migogoro haitatuliwi na watu wa nje, inatatuliwa na wao wenywewe, uongozi wa wilaya unasimama kama refa kwa ajili ya kuwaongoza.

Kikao cha kutatua Mgogoro kati ya Diwani wa kata hiyo pamoja na Wenyeviti wa Vijiji Kiliwahusisha Viongozi Kutoka ngazi ya Halmashauri ambao ni Mwenyekiti wa Halamshauri Mhe. Francis Mtega, Mkurugenzi Mtendaji wa Halmashari Kivuma Msangi, Mkuu wa Idara ya Utumishi na Utawala Aswege Kaminyoge na Afisa Habari Daudi Nyingo.

Wengine ni Kamati ya Maendeleo ya Kata (WDC), Viongozi wa CCM na Chadema ngazi ya Kata, Viongozi wa Dini, Wazee Maarufu pamoja na wataalamu ngazi ya kata.

MWISHO