“Mwalimu anatkiwa kumlea mtoto kimwili, kiroho, kiakili na kijamii”

Posted on: February 3rd, 2018

Hayo yamesemwa na Mwenyekiti wa Tume ya Utumishi wa Walimu Taifa Ndg. Oliver Mhaiki alipofanya ziara katika Wilaya ya Mbarali kwa ajili ya kujitambulisha na kufanya mkutano wa Kikao kazi na watumishi walio katika sekta ya elimu.

Akiwa katika Kikao hicho, Mwenyekiti wa Tume amewataka walimu kuwalea wanafunzi/watoto katika maadili mema, kimwili, kiroho, kiakili na kijamii, vilevile kufanya kazi kwa bidii ili iwe mfano bora wa kuigwa kwani wao ni Viongozi, mwalimu kama kiongozi anatakiwa kuto tumia madaraka yake vibaya, kumuheshimu na kumtii Mwajiri pamoja na kutii mamlaka zote halali zilizopo katika jamii inayowazunguka.

Mhaiki aliongeza kuwa, kuna mamlaka mbili ambazo zinasimamia walimu ambazo ni Mwajiri na Tume ya Utumishi wa Walimu kwa kushirikiana katika mambo mbalimbali yakiwemo, masuala ya ajira, kuthibitishwa kazini, kupandishwa cheo, kubadilishwa cheo, kupanga mipango ya mafunzo, kutoa taarifa kila robo, kustaafu/kuhitimisha utumishi, kuelimisha kuhusu uwajibikaji, haki, sheria, na utaratibu pamoja na hatua za kinidhamu.

Mwenyekiti alisema kuwa kuna kada ambazo zipo katika sekta ya elimu lakini hazihudumiwi na Tume wakiwamo, Maafisa Elimu wa Shule za Msingi na Sekondari, Waratibu elimu Kata na Wakufunzi. Mgawanyo huu upo kisheria, tume inashughulika na walimu wa shule za Msingi na Sekondari katika masuala ya ajira na nidhamu.

Tume ya Utumishi wa Walimu imeanza kufanya kazi tarehe 01/07/2016 na kwa sasa ipo chini ya Ofisi ya Rais Wizara ya Tawala za Mikoa na Serikali za Mitaa (TAMISEMI) na kwa sasa imesambaa katika Wilaya 139 ambazo zipo chini ya Ofisi za Wakuu wa Wilaya.

Naye Katibu Tawala Msaidizi Elimu kutoka Ofisi ya Katibu Tawala Mkoa Bi. Paulina Ndigeza amewapongeza Walimu wote waliopo Mkoa wa Mbeya kwa kuweza kuupandisha Mkoa wa Mbeya kufikia asilimia 81.8 kwenye matokeo ya kidato cha nne na kufanikiwa kushika nafasi ya 6 kitaifa kutoka nafasi ya 13 kwa mwaka uliopita.

Bi Ndegeza aliongeza kuwa watu wengi hawaifahamu Tume ya Utumishi wa Walimu, na lengo la ziara hiyo ni kuitambulisha Tume na kuzungumza na watumishi wote waliopo chini ya Idara ya elimu.

Kaimu Mkurugenzi Mkurugezi Mtendaji, Katibu Tawala Wilaya, Katibu Msaidizi Tume ya Utumishi wa Walimu Wilaya pamoja na Walimu waliohudhuria wameishukuru Tume kwa kufanya ziara Wilaya ya Mbarali kwa ujio wao utaongeza chachu na ufanisi katika kuwahudumia wanafunzi.

Mkutano huo ulihudhuliwa na Mwenyekiti wa Tume taifa, baadhi ya viongizi kutoka Tume Taifa, Katibu Tawala Msaidizi Elimu (REO), Katibu Tawala Wilaya ya Mbarali (DAS), Kaimu Mkurugezi Mtendaji, Walimu Wakuu, Wakuu wa Shule pamoja na Viongozi mbalimbali walipo chini ya sekta ya Elimu Wilayani Mbarali.