Naibu wa Waziri Apongeza Utoaji Mikopo ya Vikundi vya Wanawake

Posted on: March 8th, 2018

Naibu Waziri wa Kilimo Mhe. Dr. Mary Mwanjelwa, ameipongeza Halmashauri ya Wilaya ya Mbarali kwa kuweza kutoa mikopo kwa vikundi vya Wanawake wa Wilaya ya Mbarali kwa asilimia 100 na ametoa wito kwa Halmashauri zingine zilizopo hapa Tanzania kuiga mfano wa Halmashauri ya Mbarali.

Mhe. Mwanjelwa ameyasema hayo alipokuwa Mgeni Rasmi kwenye maadhimisho ya Kilele cha siku ya Wanawake Duniani iliyoadhimishwa Kiwilaya katika kata ya Rujewa kwenye Viwanja vya Shule ya Msingi Ibara siku ya tarehe 08/03/2018 Wilayani Mbarali

Halmashauri ya Wilaya ya Mbarali imefanikiwa kutoa kiasi cha fedha tsh 191,700,000/= kwa mwaka wa fedha 2016/2017 na 2017/2018 kwa vikundi vya Wanawake 45.

Mhe. Naibu Waziri ameviomba vikundi vya wanawake wote waliopata mikopo katika Wilaya ya Mbarali, kuitumia mikopo hiyo kwa umakini na kufanya marejesho ili kuviwezesha vikundi vingine vya wananwake waweze kunufaika na mikopo hiyo.

Katina hotuba yake, Mhe. Mwanjelwa amezishukuru taasisi zote za kifedha zinazotoa mikopo kwa jamii hasa wanawake ila ameziomba taasisi hizo kupunguza riba pamoja na masharti magumu wanapotoa mikopo yao ili watanzania wengi waweze kunufaika na mikopo inayotolewa na taasisi na taasisi zao.

Naye Mkuu wa Wilaya ya Mbarali Mhe. Reuben Mfune akizungumza katika maadhimisho hayo, amemshukuru Mhe naibu waziri kwa kuja kujumika na wananchi wa Wilaya ya Mbarali kwenye kilele cha shughuli hii muhimu ya kijamii, na ameipongeza Halmashauri ya Wilaya ya Mbarali kwa kuweza kutoa fedha za mfuko wa wanawake na vijana kwa asilimia 100 kwa miaka mitatu mfululizo, kitu ambacho hakijawahi kutokea kwa miaka ya nyuma.

Wakizungumza katika risala, kwa umoja wao wanawake wa Wilaya ya Mbarali wamemuomba Mhe Naibu Waziri na uongozi Wilaya ya Mbarali kwa ujumla kuwapa uwakilishi mkubwa katika vikao vya maamuzi, na wameziomba taasisi za fedha kutoa mikopo yenye riba nafuu.

Wamewaasa wanawake wenzao kujiunga na Vikundi mbalimbali vya akina mama ili waweze kunufaika na mikopo inayotolewa na Serikali vilevile wameiomba Serikali kujenga Zahanati kwa kila Kijiji pamoja na Vituo vya Afya kwa kila Kata sambamba na kuboresha huduma za uzazi ili kutokomeza vifo vya mama na mtoto.

Kauli mbiu ya siku ya Wanawake duniani mwaka 2018 ni “kuelekea Uchumi wa viwanda, tuimalishe usawa wa kijinsia na uwezeshaji wa wanawake Vijijini”

Katika maadhimisho hayo, Mhe Naibu Waziri aliweza kutembelea mabanda mbalimbali yaliyokuwa yanaonyesha shuguli za Uchumi za kijasiliamali zinazofanya na Vikundi vya wanawake wa Wilaya ya Mbarali mabanda ya taasisi za kifedha pamoja na banda la damu salama.

Sherehe hizo zilishereheshwa na burudani mbalimbali, zikiwemo ngoma za asili, shairi, kwaya pamoja na mchezo wa kukimbiza kuku.

Daudi B. Nyingo
Afisa Habari na Mahusiano
Halmashauri ya Wilaya ya Mbarali
March 8, 2018