Naibu Waziri Ashusha Neema kwa Wakazi wa Kitongoji cha Machimbo Mbarali

Posted on: December 3rd, 2017

Naibu Waziri wa Maliasili na Utalii Mhe. Japhet Ngaironga Hasunga  ameahidi kuwalipa fidia ya kiasi cha tsh milioni 717,653,500/=  wakazi wa Kitongoji cha Machimbo wapatao 308 wanaoishi katika Kijiji cha Mabadanga kata ya Mapogoro ambao  wamechukuliwa maeneo yao kwa ajili ya kupisha upanuzi wa Pori la Akiba la Mpanga Kipengele hadi kufikia mwezi wa pili mwaka 2018.

Mhe. Naibu Waziri aliyaongea hayo kwenye mkutano wa hadhara ulioitishwa katika Kitongoji hicho cha Machimbo, wakati alipofanya ziara ya kutembelea Pori la Akiba la Mpanga Kipengele siku ya jumamosi ya tarehe 02/12/2017.

“Naagiza hadi kufika mwezi wa pili mwishoni watu wote wawe wameshalipwa, nitapita hapa mwezi wa pili, na mwakani tutalipa Vijiji vingine”

Mhe Hasunga aliongeza ya kuwa, Jumla ya Vijiji 13 vinatarajiwa kulipwa fidia kwa ajili ya kupisha Pori hilo la Akiba, kwani maamuzi ya Serikali ni kuwalipa fidia wale wote ambao upanuzi wa Pori umegusa maeneo yao. Katika kuwalipa wakazi hao, Serikali imepanga kuwalipa kwa awamu kwa kuanza na Kitongoji cha Machimbo kilichopo  Kijiji cha Mabadaga.

Vilevile alisema kuwa upanuzi wa Pori la Akiba la Mpanga Kipengele utasaidia kuongeza mapato ya Nchi  ya mtu mmoja mmoja katika Wilaya ya Mbarali, kwani watu watajipatia ajira na biashara mbalimbali zitaanzishwa kupitia watalii watakaotoka sehemu mbalimbali na kuja kutalii katika eneo hilo.

Nao wananchi wanaoishi katika Kitongoji cha Machimbo wamemshukuru Mhe Naibu Waziri wa Maliasili na Utalii kwa kukipendelea Kitongoji chao kwani kwa kipindi kirefu wamekuwa wakiishi hapo bila ya kuwepo kwa huduma za kijamii ikiwemo huduma ya afya, elimu pamoja na maji, vilevile wameomba kusaidiwa katika suala la malipo kwani yana changamoto nyingi wengi wao hawana ufahamu mzuri wa utunzaji wa fedha.

Naye Mkuu wa Wilaya ya Mbarali Mhe. Reuben Mfune amemshukuru Mhe. Naibu Waziri kwa fufanya ziara katika Wilaya ya Mbarali kwani ujio wake umeleta neema kwa wakazi wa Kitongoji cha Machimbo, kwani wakazi hao walikuwa na kiu kubwa ya kumsikiliza.

Mhe. Mfune aliongeza kwamba, fedha watakazolipwa zitawawezesha wakazi hao kuweza kutafuta maeneo mengine mbadala kwa ajili ya kuendesha maisha yao, vilevile ameahidi kusimamia yale yote yaliyoelekezwa ili kuhakikisha kila anaestahili kulipwa anapata haki yake