Naibu Waziri Atembelea Maporomoko na Mapango Yaliyopo Ndani ya Pori la Akiba la Mpanga Kipengere

Posted on: December 3rd, 2017

Naibu Waziri wa Maliasili na Utalii Mhe. Japhet Ngaironga Hasunga amefanya ziara ya kutembelea maporomoko ya maji na Mapango/Mahandaki (ambayo yalitumiwa na chifu Mkwawa) yaliyomo ndani ya Pori la Akiba la Mpanga Kipengele ili kujionea namna maliasili hizo zinavyohifadhiwa siku ya jumamosi ya tarehe 02/012/2017.

Akiwa katika ziara hiyo aliyoongozana na Mkuu wa Wilaya ya Mbarali Mhe. Reubeni Mfune, Kamati ya Ulinzi na Usalama pamoja na Wataalam mbalimbali kutoka katika taasisi tofauti wilayani hapa, Mhe Naibu waziri ameweza kujionea  Mahandaki ambayo yalitumiwa na Chifu Mkwawa wa Kabila la Wahehe kujificha alipokuwa akipigana vita na Wajerumani, na amefurahishwa na namna maporomoko hayo yanavyohifadhiwa katika pori hilo kwani ni kivutio kizuri sana katika kukuza utalii wa hapa Nchini.

“Naomba tutumie hii nafasi kutangaza Nchi yetu kuonyesha utajili tulio nao, mimi nina imani kabisa tukiwekeza vya kutosha tunaweza tukapata mapato makubwa na Wilaya zetu hizi Mbarali, Makete pamoja na Wanging’ombe tutakuwa tumefika mbali na tukapiga hatua, tukiwekezaa hoteli huku, tukawekeza vivutio vingine na watalii wakitoka huko wakavifuata, basi maendeleo ya watu wetu yataweza kupatikana”

Amesema kuwa, kwa sasa changamato iliyopo ni kwa wahusika kuboresha miundombini iliyopo ili iweze kufanikisha kufika kwenye mapango na maporomoko hayo kwa urahisi, na ametoa wito kwa watu wote pindi wanapopata nafasi waweze kutembelea na kutangaza Utalii ulipo Tanzania.

Mkuu wa Wilaya ya Mbarali Mhe. Reuben Mfune amemshukuru Mhe. Naibu Waziri kwa kufanya ziara katika Wilaya ya Mbarali kwani ujio wake umeleta fulsa katika kufungua utalii wa Wilaya ya Mbarali.