RC MBEYA AKABIDHI BATI ZA MILIONI 20 KWA WILAYA YA MBARALI

Posted on: December 24th, 2019

Mkuu wa Mkoa wa Mbeya Mhe. Albert Chalamila, Ametekeleza ahadi yake aliyoitoa siku ya Harambee ya tarehe 18/12/2019 katika Wilaya ya Mbarali ya kutoa bati 840 (bundle 70) zenye thamani ya kiasi cha shilingi 20,3000,000/= milion kwa ajili ya kuchangia ujenzi wa miundombinu ya vyumba vya madarasa.

Mhe. Chalamila ametekeleza ahadi hiyo siku ya tarehe 23/12/2019 katika ukumbi wa Mkapa uliopo mkoani Mbeya alipokuwa akikabidhi msaada wa Bati 3,000 (bundle 250) kwa Wakuu wa Wilaya za Mkoa wa Mbeya wenye mahitaji ya ujenzi wa vymba vya madarasa.

*“Tunatakiwa kukamilisha ujenzi wa vyumba vya madarasa 59 kwa mkoa mzima, wenzetu Mbarali wana mzigo mkubwa wa madarasa ambayo sio chini ya 36 ambayo yanatakiwa yawe yamekamilishwa kabla ya mwezi wa pili, nimenunua bundle 250 zenye gharama ya tsh milio 72.5 kwa lengo la kupunguza mzigo ili watoto wetu waweze kuingia madarasani.”*

*“Wenye mahitaji makubwa zaidi kama Mbarali nitawapa bundle 70 kwa lengo la kupunguza mzigo wa madarasa ili waezeke haraka na watoto wetu waweze kuanza kuanza kusoma kwa haraka zaidi.”*

Akizungumza katika makabidhiano hayo, Mkuu wa Wilaya ya Mbarali Mhe. Reuben Mfune amemshukuru Mkuu wa Mkoa wa Mbeya kwa kutekeleza ahadi yake aliyoitoa ndani ya muda mfupi na amewataka wananchi wa Wilaya ya Mbarali kuendelea kuchangia nguvu kazi pamoja na vifaa vingine ili kukamilisha ujenzi wa vyumba vya madarasa vilivyobaki.

Mwenyekiti wa Halmashauri ya Wilaya ya Mbarali Mhe. Francis Mtega amesema kuwa ahadi hii imetekelezwa kwa muda muafaka ambao kumekuwa na mahitaji makubwa ya umaliziwaji wa vyumba vya madarasa na amewataka wazazi kujiandaa kupeleka watoto wao kuanza kidato cha kwanza kabla ya mwezi wa pili 2019.

Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi amesema, mara baada ya kukabidhiwa bati hizo kuna uhakika kwa zile shule zilizofikia hatua ya kupauliwa zitapauliwa na wanafunzi 1,665 ambao walikuwa bado hawajachaguliwa wataingia kidato cha kwanza.

Mkuu wa Mkoa wa Mbeya amegawa bati bundle 250 kwa halmshauri zote 7 za Mkoa wa Mbeya ambapo Halmashauri ya Wilaya ya Mbarali wamepewa Bundle 70, Halmashauri ya Wilaya ya Mbeya bundle 55, Halmashauri ya Jiji la Mbeya bundle 55, Halmashauri ya Wilaya ya Kyela 15, Halmashauri ya Wilaya ya Busekele 15, Halmashauri ya Wilaya ya Chunya 15 na Halmashauri ya Wilaya ya Rungwe 25.
MWISHO