SERIKALI YAWATAKA WENYEVITI WAVITONGOJI KUEPUKA MIGOGORO ISIYO YA LAZIMA

Posted on: February 12th, 2020

SERIKALI wilayani Mbarali imewatahadharisha wenyeviti wa vitongoji kujiepusha na utendaji kazi usiozingatia matakwa ya wajibu wao kwani wanaweza kusababisha migogoro isiyo ya lazima na kusababisha migongano ndani ya jamii wanayoiongoza.

Tahadhari hiyo ilitolewa na Mkuu wa wilaya ya Mbarali, Mhe. Reuben Mfune siku ya tarehe 12/02/2020 alipokuwa akitoa salamu za Serikali kwenye kikao cha kwanza cha Baraza la Mamlaka ya Mji Mdogo Rujewa.

“Kuuza maeneo kuuza viwanja siyo kazi yako wewe mwenyekiti wa kitongoji.Mtazalisha kesi ambazo badaye zinawashinda na kusababisha malalamiko mengi.Kazi hiyo ziachieni mamlaka husika.”

“Unapoomba kuwa kiongozi uwe tayari kuwa kiongozi. Kiongozi ni mtu anayewaongoza wenzake kufikia malengo ya kimaendeleo wanayotamani kuyafikia na si kuwa chanzo cha migogoro ndani ya jamii.Lazima uwe na vikao kwenye eneo lako ili upate hoja za msingi za kuzileta kwenye vikao vya baraza hili la Mamlaka ya mji mdogo.” Alisisitiza Mfune.

Mhe. Mfune amewataka wevyeviti wote wa Vitongoji kusimamia shughuli za maendeleo ikiwemo ujenzi wa zahanati, vyumba vya madarasa, vyoo bora, kuwafichua wanaokwepa kulipa kodi ya Serikali pamoja na kujikita kwenye majukumu yao ya msingi ikiwemo kufanya mikutano kwa mujibu wa sheria kila mwezi na kisha kuchukua kero za wananchi na kuziwasilisha kwenye Baraza la Mamlaka ya mji mdogo ili ziweze kutafutiwa majibu sahihi.

Kaimu Mkurugenzi wa Halmashauri ya wilaya ya Mbarali, Ndg. Aswege Kaminyoge aliwataka wajumbe hao kujenga tabia ya kushirikiana kwakuwa miongoni mwao wapo wenyeji walio na uzoefu pamoja na wale ambao kwa mara ya kwanza ndiyo wameingia kwenye ulingo wa uongozi.

Kaminyoge aliwataka wenyeviti hao sambamba na majukumu mengine kuhakikisha wanafuatilia watoto wote waliofikisha umri wa kuanza shule wanaandikishwa kwenye shule zilizopo jirani nao badala ya kuwaacha wakizurula mitaani au kutumikishwa kazi na wazazi na walezi.

Katika kikao hicho cha kwanza cha mamlaka ya Mji Mdogo wa Rujewa kulifanyika Uchaguzi wa nafasi za wenyeviti mbalimbali ambapo Ndg. Chameta Godigodi amechaguliwa kuwa Mwenuekiti wa Mamlaka ya Mji Mdogo wa Rujewa na Ndg. Elly Kimilike amechaguliwa kuwa Makamu Mwenyekiti.

Kufuatia uchaguzi huo, Ndg. Godigodi anaendelea pia kuwa Mwenyekiti wa Kamati ya Fedha, Utawala na Mipango huku Ndg. Kimilike ataendelewa pia kuwa Mwenyekiti wa Kamati ya Ukimwi wakati Mwenyekiti wa Kamati ya Elimu, Afya na Maji alichaguliwa Ndg. Abubakar Chomba na kamati ya Uchumi, Ujenzi na Mazingira alichaguliwa Ndg. Alphonce Nditi.

Mwisho.