SHULE ZA MSINGI 12 ZAPATIWA HATI ZA UMILIKI RASMI WA MAENEO.

Posted on: December 11th, 2025

Mkurugenzi Mtendaji wa Halmashauri ya Wilaya ya Mbarali, Ndugu Raymond Mweli amekabidhi hati 12 za kumiliki rasmi  maeneo kwa Wakuu wa Shule za Msingi waliopima na kurasimishwa maeneo yao leo Desemba 12, 2025.

Hati hizo zimekabidhiwa Kwa Shule za Msingi 12 ambazo ni Mayota, Matebete, Mambo, Ibohera, Chosi A, Kapunga, Msesure, Motomoto, Kanioga, Ruiwa, Miyombweni na Kapunga B.

Hati hizo za Umiliki rasmi wa maeneo zimetolewa kwa Shule hizo ambazo maeneo hayo yalipimwa na Kurasimishwa Kwa vijiji kupitia program ya Uramishaji maeneo ya Taasisi za Serikali unaofanywa na Idara ya Ardhi Halmashauri ya Wilaya ya Mbarali.

 Akikabidhi hati hizo Ndugu Raymond Mweli amesema  kuwa Kwa kipindi chake atahakikisha maeneo yote ya Taasisi za Serikali yanafanyiwa Urasimishaji wa maeneo ili kuondoa  migogoro ya Ardhi ambayo hujitokeza katika maeneo mbalimbali.

"Nataka maeneo yote ya watu binafsi na Taasisi yawe na hatimiliki na tunaamini kupitia mpango huu hatutakuwa na migogoro ya Ardhi tena Mbarali hivyo basi hati hizi mkazisimamie na kuendeleza maeneo hayo", amesema Ndg. Raymond Mweli.