TAARIFA KWA UMMA NA VYOMBO VYA HABARI

Posted on: February 11th, 2021

TAARIFA KWA UMMA NA VYOMBO VYA HABARI 

Baraza la Madiwani la Halmashauri ya Wilaya ya Mbarali, limepitia na kupitisha mapendekezo ya mpango wa Bajeti kiasi cha Sh. 45,890,254,767.49 kwa mwaka wa fedha 2021/2022 kutoka vyanzo mbalimbali vya Mapato siku ya tarehe 11/02/2021.

Kati ya fedha hizo, Mapato kutoka Serikali Kuu na Wadau wa Maendeleo ni Sh. 40,990,998,767.49 na Mapato kutoka katika vyanzo vya ndani (Own Source) Sh. 4,899,256,000.00. Mgawanyo wa fedha hizo ni kama ifuatavyo Sh. 31,036,186,000.00 ni Mishahara, Sh. 5,176,754,785.49 ni Matumizi ya kawaida na Sh. 9,677,313,982.00 ni Miradi ya Maendeleo.

Mpango na Bajeti ya Miaka Mitatu 2021/22- 2023/24 na Makisio ya Mapato na Matumizi kwa Mwaka 2021/22 umeandaliwa kwa kuzingatia, Ilani ya Uchaguzi ya Chama Tawala (CCM) 2020-2025, Hotuba ya Rais wa Jamhuri ya Muungano wa Tanzania Ndg. John Pombe Joseph Magufuli wakati wa kufungua rasmi Bunge la 12 la Jamhuri ya Muungano wa Tanzania Dodoma Tarehe 13 Novemba, 2020.

Mwongozo wa Maandalizi ya Mpango na Bajeti Serikali kwa mwaka 2021/22 uliotolewa na Wizara ya Fedha na Mipango, Vipaumbele vya Serikali ya awamu ya tano, Maagizo ya Viongozi wa Kitaifa, Mpango Mkakati wa Halmashauri wa Mwaka 2018/19 - 2023/24, Mpango Mkakati wa Ofisi ya Rais, Tawala za Mikoa na Serikali za Mitaa (OR- TAMISEMI),

Mpango Mkakati wa Lishe wa Taifa, Sheria ya Bajeti Na. 11 ya mwaka 2015 na Kanuni zake, Dira ya Maendeleo ya mwaka 2025, Mpango wa Maendeleo Endelevu 2030, Mapitio ya Utekelezaji wa Bajeti ya mwaka 2020/21, pamoja na Vipaumbele vya wananchi wa Wilaya ya Mbarali kupitia Mfumo ulioboreshwa wa Fursa na Vikwazo kwa Maendeleo (Improved Opportunities and Obstacles to Development- O&OD)

Halmashauri ya Wilaya ya Mbarali inafikia malengo ya kuwahudumia wananchi wake kupitia Mpango wa Miaka Mitatu 2021/22- 2023/24, Sekta za Kilimo, Mifugo, Elimu Msingi, Elimu Sekondari, Ardhi na Maendeleo ya Jamii zitaonesha matokeo chanya ya malengo katika kutekeleza mpango wa miaka mitatu

Halmashauri ya Wilaya ya Mbarali katika bajeti yake ya mwaka 2021/22 itajikita katika kuendelea na Ujenzi Miradi ya Kimkakati iliyopata fedha kutoka Serikali kuu ambayo ni Kituo cha Afya Utengule Usangu na Hospitali ya Wilaya, Kuwezesha ukamilishaji wa ujenzi wa banio katika Skimu ya Umwagiliaji Ukwavila, Kuwezesha ujenzi wa vivusha maji vitatu (3) katika Skimu ya Umwagiliaji Msesule, Kuwezesha usakafiaji wa mfereji mita 40 skimu ya umwagiliaji Azimio Mswiswi (FAO).

Kuendelea na ujenzi wa kituo cha Afya Mahongole, kuwezesha uchimbaji wa visima katika Shule za Sekondari za Ihanga- Mbarali na Ipwani, Kujenga shule ya Msingi ya Mchepuo wa Kiingereza (English Medium Primary School), Kuwezesha wakulima 70 kuzalisha mbengu za kuazimia ubora (QDS) tani 210 katika Kongani 3 za Rujewa, Madibira na Igurusi.

Kuendelea na ujenzi wa Shule ya Wasichana Uturo, Kuendeleza ujenzi wa miundombinu katika Shule za Sekondari na Msingi, Kutoa usaidizi katika Jitihada mbalimbali za wananchi katika Vijiji na Kata, Kuboresha miundombinu katika Sekta ya Kilimo na Mifugo, Kuboresha Lishe kwa watoto, Ulipaji wa madeni mbalimbali, Kuwezesha vikundi vya wanawake, vijana na walemavu.

Kuendelea kupambana na Maambukizi ya VVU/UKIMWI, Kuhamasisha wananchi kushiriki kikamilifu katika Uchumi wa Viwanda, Kukabiliana na Mabadiliko ya Tabia ya Nchi (Climate Change) pamoja na kutambua jitihada za Jamii katika Kukabiliana na Mabadiliko hayo pamoja na Kuimarisha ukusanyaji wa mapato ya Halmashauri kwa kuboresha vyanzo vya mapato vilivyopo pamoja na kubuni vyanzo vipya.

Katika kipindi cha mwaka wa fedha wa 2020/21, Halmashauri ya Wilaya ya Mbarali iliidhinishiwa matumizi ya jumla ya Sh. 45,930,332,615.00  kati ya hizo Sh. 32,090,368,000.00 ni matumizi ya mishahara, Sh. 3,937,500,000.00 ni Mapato ya ndani, Sh. 1,159,244,999.00. ni matumizi mengineyo NHIF Sh. 300,000,000.00, CHF Sh. 100,000,000.00, User Fee Sh. 150,000,000, Ada za Wanafunzi Sh. 40,250,000.00, Michango ya Jamii (EK, Minara, nk) Sh. 144,256,000.00 na Sh. 8,008,713,616.00 ni matumizi ya miradi ya maendeleo.

Hadi kufikia Disemba, 2020, Jumla ya Sh. 18,596,749,460.65 zilipokelewa kati ya hizo, Sh. 13,939,100,697.00 ni fedha za mishahara, Sh. 718,750,500.00 ni fedha za matumizi mengineyo, Sh. 1,650,395,929.81 ni miradi ya maendeleo na Sh. 2,120,112,010.95 ni makusanyo ya ndani, NHIF Sh. 28,109,060.00, CHF Sh. 48,281,266.29 na User Fee Sh 48,399,496.60 na ada za wanafunzi Sh. 43,600,500.00.00. Hii ni sawa na asilimia 40.49 ya fedha zilizoidhinishwa kwa mwaka 2020/2021.

Kwa taarifa zaidi tembelea http://mbaralidc.go.tz/announcement/muhtasali-wa-bajeti-ya-halmashauri-ya-wilaya-ya-mbarali-ya-mwaka-2021-2022

Daudi B. Nyingo

Afisa Habari

Halmashauri ya Wilaya ya Mbarali

11/02/2021