Tuache Kuchukua Kazi za Wataalamu, Tufanye Kazi Zetu za Kilimo - Mhe. Mfune

Posted on: November 14th, 2019

Haya yamesemwa na Mkuu wa Wilaya ya Mbarali Mhe. Reuben Mfune siku ya tarehe 13/11/2019 alipofanya ziara katika Kata za Imalilosongwe na Mahongole kwa ajili ya kushughulikia mgogoro wa watumia Maji uliosababishwa na zoezi la ufukuaji wa Mto Mbarali pamoja na Mto Mkoji ili kuimarisha Mkondo wa Maji uliokuwa unapoteza muelekeo kwenye Kata za Mahongole, Kongoro Mswisi, Utengule Usangu pamoja na Imalilosongwe.

Katika ziara hiyo Mhe. Mfune amewataka wakulima kuacha kufanya kazi za Wataalamu na badala yake wawasikilize Wataalamu waliowekwa kwa mujibu wa sheria.

“Tutumie mashine sehemu ambazo hakuna mazao na Sehemu zenye mazao tutumie majembe ya mikono kama milivyokubaliana, kazi zote hizo zisimamiwe na wataalamu, tusitumie madaraka yetu kutoa maelekezo nini kifanyike, mtafuata maelekezo kutoka kwa wataalamu wetu na wao watawaelekeza nini cha kufanya.”

“Kuna watu wanataka mifereji isichimbwe kwa ajili ya manufaa yao, na hao ndio walioleta migogoro hiyo, nawasihi tufuate sheria.”  Alisema Mhe. Mfune

Mhe Mfune aliongeza kuwa ufukuaji wa mito ili kuimarisha mkondo wa Maji unafaida kubwa ikiwemo upatatikanaji wa Umeme, kwani unatoa ajira pamoja na matumizi mengine ya majumbani, uzalishwaji wa bidhaa na matumizi ya  viwandani. Umeme unazalishwa kwa maji, na maji ni haya yanayopita kwenye mito.

Mkuu wa Wilaya alikagua sehemu zote zinazolalamikiwa kwa kuambatana na baadhi ya viongozi wa kata, wataalamu, viongozi wa jumuia za watumia Maji pamoja na baadhi ya wananchi wa maeneo hayo.

MWISHO