Tuiombee Nchi yetu kama tulivyoomba kipindi cha Korona-Mfune

Posted on: August 29th, 2020

Hayo yamesemwa na Mkuu wa Wilaya ya Mbarali Mhe. Reuben Mfune kwenye kikao cha pamoja kati ya Viongozi wa Dini, Viongozi wa Vyama vya siasa, wazee maarufu pamoja na wasimamizi wa uchaguzi ngazi ya jimbo kwa lengo la kuhamasiha jamii ili iweze kushiriki kikamili uchaguzi Mkuu wa tarehe 28/10/2020 pamoja kujadili maadili kwa vyama vya siasa na wagombea katika kuendesha shughuli za siasa wakati wa kampeni siku ya tarehe 28/08/2020 katika ukumbi wa Halmashauri.

Katika kikao hicho Mhe. Mfune amewaomba viongozi wa dini wa madhehebu yote kuendelea kuliombea taifa letu kama walivyofanya kipindi cha ugonjwa wa Korona ili uchaguzi ufanyike kwa amani.

"Wakati tulivyokuwa na changamoto kubwa ya Ugonjwa wa Korona mlishiriki kwa kiasi kikubwa kuliombea Taifa letu, msisite kuendelea kuliombea Taifa letu kwa kuwa haya mambo ndiyo yanayoweka mstakabali wa maendeleo ya nchi yetu, tunawaomba katika sala mbalimbali mshirikishe na uchaguzi mkuu ambao ndio utakaotupatia viongozi watakaotuongoza kwa miaka mitano ijayo."

"Nawasihi sana Vyama vya siasa kufuata ratiba za kampeni kama zilivyopangwa, kufanya kampeni za kistaarabu, kunadi sera na mipango yenu na sio kampeani lugha za matusi, kashfa au kudhalilisha utu wa watu wengine na kwa ambae atakwenda kinyume na taratibu atachukuliwa hatua za kisheria." Alisema Mhe. Mfune

Mhe Mfune aliongeza kuwa, Uchaguzi ni mchakato unaojumuisha hatua na taratibu mbalimbali za kufuatwa na kuzingatiwa kwani kwani ndio msingi wa uchaguzi kuwa mzuri na wenye ufanisi, kwani itasaidia kupunguza au kuondoa kabisa malalamiko au vurugu wakati wote wa mchakato.

Mkurugenzi Mtendaji wa Halmashauri ya Wilaya ya Mbarali ambaye ni Msimamizi wa uchaguzi ngazi ya Jimbo Ndugu Kivuma Msangi alisema kuwa kwa upande wa jimbo la Mbarali wanachama watano wa vyama tofauti waliochukua fomu za ubunge ila waliorudisha ni wananchama wanne, na kwa upande wa madiwani waliochukua fomu ni wanachama 55 wa vyama tofauti na  ambao wamerudisha fomu ni wananchama 54.

Mwanasheria wa Halmashauri ya Wilaya ya Mbarali ambaye ni Msimamizi msaidizi ngazi ya jimbo Bi. Jackline Ngaiza aliongeza kuwa, wagombea wote wa nafasi mbalimbali za uongozi pamoja na vyama vyao, wanatakiwa kuheshimu na kufuata Katiba ya Nchi, Sheria ya Uchaguzi, Kanuni za Uchaguzi, maadili ya uchaguzi na maelekezo ya Tume ya Taifa ya Uchaguzi pamoja na sheria zingine za Nchi katika kipindi chote cha uchaguzi.

MWISHO