Tunahitaji vyoo bora na sio bora vyoo, suala la bora vyoo tumeshapita- Mfune

Posted on: October 22nd, 2018

Hayo yamesemwa na Mkuu wa Wilaya ya Mbarali Mhe. Reuben Mfune siku ya tarehe 22/10/2018 alipokuwa akifanya ziara katika kata za Ihahi, Chimala pamoja na itamboleo kwa ajili ya kufuatilia maagizo aliyoyatoa tarehe 07/09/2018 kwenye kikao alichokiitisha na watendaji wa vijiji, watendaji wa kata pamoja na wenyeviti wa vijiji.

Katika kikao hicho Mhe. Mfune aliagiza watendaji wote pamoja na wenyeviti kuongeza juhudi katika kusimamia ujenzi wa zahanati kwa kila kijiji, ujenzi wa vyumba vya madarasa, masuala ya lishe kwa watoto, uandikishaji wa vyeti vya kuzaliwa kwa watoto wenye umri wa chini ya miaka mitano pamoja na ujenzi wa vyoo bora kwa kila kaya.

Akiwa katika ziara hiyo, Mkuu wa Wilaya alisikitishwa na kasi ndogo ya ujenzi wa vyoo bora kwani hadi sasa kuna baadhi ya wananchi hawana vyoo na haijulikanai wanajisaidia wapi wanapobanwa na haja.

“Ni aibu wengine wanafikilia kufanya mambo makubwa kama kuunda ndege, sisi tunalazimishana kwenda chooni, kwa sasa tutachukuliana hatua kuhusu hili.”

Kuhusiana na ujenzi wa vyumba vya madarasa pamoja na zahanati mhe. Mfune alisema kuwa, hajaridhishwa na suala la ukusanyaji wa michango, na kuanzia sasa hataki kusikia neno mikakati au neno tulipanga jana, anachotaka ni kazi kufanyika, maendeleo yapatikane ili wananchi wapate huduma na wale wote watakaokaidi kutoa michango, wapelekwe kwenye mabaraza ya kata.

“Nikifika awamu ijayo hatutakaa vikao vya ndani, tutazunguka kwenye miradi kuangalia utekelezaji wa maagizo niliyoyatoa, nikute hali ya tofauti, madarasa yanaendelea kujengwa mengine yanaendelea kukamlishwa ”

Mhe. Mfune amezipongeza kata na vijiji vyote ambavyo vinaendelea vizuri katika ujenzi na ukamilishaji wa zahanati pamoja na vyumba vya madarasa na amewataka waongeze juhudi ili wananchi waweze kupata huduma, na kufikia januari wanafunzi wanapokuja wakute sehemu za kusomea zimekamilika.

MWISHO.