TUSHIRIKIANE NA SERIKALI MPANGO WA KUDHIBITI UKIMWI IFIKAPO 2030

Posted on: December 1st, 2025

DC SURUMBU AITAKA JAMII NA TAASISI MBALIMBALI KUSHIRIKIANA NA SERIKALI KATIKA MPANGO WA KUDHIBITI UKIMWI IFIKAPO 2030

Mkuu wa Wilaya ya Mbarali, Mhe Brig. Jen. Maulid Hassan Surumbu ametoa wito kwa jamii, wadau mbalimbali pamoja na taasisi zilizopo Wilayani humo kushikirikiana na Serikali katika mpango wa mapambano dhidi ya maambukizi ya Virusi vya UKIMWI kuelekea mkakati wa Serikali kuutokomeza ugonjwa huo ifikapo mwaka 2030.

Mkuu huyo wa Wilaya Brig. Jen. Surumbu amesema hayo katika Maadhimisho ya Siku ya UKIMWI Duniani ambapo kwa Wilaya hiyo yamefanyika Kata ya Kongolo Mswiswi yakiambatana na matukio mbalimbali ikiwemo upimaji wa hali ya afya na lishe, magonjwa ya kinywa na meno, uchangiaji wa damu pamoja na upimaji wa virusi vya UKIMWI kwa hiari; huduma ambazo zimetolewa bure kwa siku nzima wakati wa maadhimisho hayo.

“Kiwango cha maambukizi ya VVU kwa Wilaya yetu na Mkoa wa Mbeya kwa ujumla kiko juu ukilinganisha na takwimu za Kitaifa, lengo kubwa la siku hii ni kuwakumbuka waathirika waliopoteza maisha kutokana na UKIMWI, pia kutokomeza au kuondoa unyanyapaa kwa waathirika na kutoa elimu ya kujikinga na VVU na ugonjwa wa UKIMWI", amesema Mhe. Bri.Jen. Surumbu.

Aidha Mhe. Surumbu ametumia nafasi hiyo kuwataka Viongozi na Wasimamizi wa ujenzi wa madarasa kuhakikisha wanakamilisha mapema ujenzi unaoendelea kwenye shule mbalimbali kabla ya Januari ili shule zitapofunguliwa wanafunzi wapokelewa na kujiandikisha shule za msingi na kidato cha kwanza mwaka 2026 maelekezo ambayo yamepokelewa na Kaimu Mkurugenzi Mtendaji wa Halmashauri ya Wilaya ya Mbarali, Ndugu Patrick Charles na kuahidi kusimamia utekelezaji wake. 

Mratibu wa shughuli za UKIMWI kutoka Halmashauri ya Wilaya ya Mbarali, Bi. Neema Swila amesema wamekuwa wakisisitiza na kutoa elimu kwa jamii juu ya njia bora za kujikinga na ugonjwa huo ikiwemo elimu ya kuacha ngono zembe, matumizi sahihi ya mipira ya kujikinga dhidi ya maradhi ya ngono pamoja na uaminifu baina ya wenza.