Tusisubiri Kukumbushwa Mambo Ambayo Tunajua ni Wajibu Wetu. Mfune

Posted on: September 7th, 2018

Hayo yamesemwa na Mkuu wa Wilaya ya Mbarali Mhe. Reuben Mfune kwenye kikao kazi alichokiitisha na watendaji wa kata na vijiji siku ya tarehe 07/09/2018 kwa ajili ya kujadili mambo mbalimbali ya maendeleo pamoja na kukumbushana majukumu ya kila siku ya kila mmoja.

Mambo ambayo yalijadiliwa ni pamoja na ujenzi wa vyumba vya madarasa kwa mwaka 2018/2019, ujenzi wa vituo vya afya kwa kila kata, ujenzi wa zahanati kwa kila kijiji, masuala ya lishe bora kwa watoto, uandikishaji wa vyeti vya kuzaliwa kwa watoto chini ya miaka 5, utaratibu wa kusikiliza kero na malalamiko kwa wananchi kwa ngazi wilaya, kata na vijiji, suala la usafi wa mazingira kwa kila kata na vijiji na utekelezaji wake kila Jumamosi ya mwisho wa Mwezi, ulinzi na usalama wa mali za umma, ujenzi wa vyoo bora, migogoro ya Ardhi, mifugo pamoja na upatikanaji wa vitambulisho vya Taifa.

Katika kikao kazi hicho, Mkuu wa Wilaya amewataka watendaji wote wa vijiji na kata kuhakikisha ujenzi zahanati na vyumba vya madarasa unakamilika kwa wakati ili wananchi waanze kupata huduma pamoja na wanafunzi waliomaliza darasa la saba mwaka huu watakapochaguliwa kujiunga na masomo ya kidato cha kwanza wakute vyumba vimekamilika na vipo tayari kwa matumizi.

Mhe. Mfune ameagiza zoezi la usafi wa mazingira lisimamiwe kwa ukamilfu na kila ifikapo Jumamosi ya mwisho wa mwezi atakuwa anafuatilia ili kuona utekelezaji wake na atakaekutwa eneo lake halijafanyiwa usafi ifikapo saa nne asubuhi atachukuliwa hatua za kisheria.

Kila mwananchi anatakiwa kushiriki usafi katika kaya yake na maeneo ya jumuiya yaliyopangwa, na kila mwenyekiti wa kitongoji asimamie na ahakikishe zoezi la usafi linafanyika kila jumamosi ya mwisho wa mwezi.

kuhusiana na vyoo bora, ilielezwa kuwa choo bora ni kile chenye sakafu inayosafishika, kuta imara, kiwe na paa za bati, kuwe na mlango unaofunguka na kufuna ndani na nje, kiwe na usiri pamoja na kuwa na kifaa cha kunawia mikono.

"Siku ya Alhamisi ni siku ya kusikilizwa kero na malalamiko kwa ngazi ya wilaya, siku ya jumatano ni siku ya kusikilizwa kero na malalamiko kwa ngazi ya kata na siku ya jumanne ni siku ya kusikilizwa kero na malalamiko kwa vijiji vyote" 

"Mtumishi wa umma ni marufuku kuondoka kwenye kituo chako cha kazi bila ya kufuata utaratibbu uliowekwa kwa mujibu wa sheria"