Tutaendelea Kuboresha Miundombinu ya Umwagiliaji Mbarali-Mfune

Posted on: November 24th, 2020

Mkuu wa Wilaya ya Mbarali Mhe. Reuben Mfune amewaahidi wakazi wote wa Mbarali kuwa Serikali itaendelea kuboresha miundombinu yote ya kwenye Skimu za Umwagiliaji zilizopo wilayani hapa kadri watakavyoendelea kupata Fedha.

Mhe. Mfune ameyasema hayo siku ya tarehe 23/0/11/2020 alipokwenda kutembela na kukagua maendeleo ya ujenzi wa Banio la Skimu ya Lyahamile-Ukwavila lililopo katika kijiji cha Uturo kata ya Mapogoro.

“Ujenzi wa banio hili ni maagizo yangu niliyoyatoa mwezi wa 3 mwaka huu 2020 mara baada ya sehemu waliyochukulia maji kutoka mto Ruaha ambayo haikuwa na Banio kuharibiwa na mvua na kuharibu miundombinu ya barabara ya kijiji cha Uturo na Ukwavila.”

“Hadi sasa wananchi wa vijiji hivyo wameweza kuchangia kiasi cha shilingi milioni 175 ambazo zinawezesha kazi kuendelea, na mimi niwaahidi tu kadri tutakavyokuwa tunapata fedha tutaendelea kuboresha mfereji huo pamoja na mifereji mingine iliyopo Mbarali  kwani mifereji hiyo inawanufahisha wananchi wengi.” Alisema Mfune

Mhandisi wa Kilimo na Umwagiliaji wa Halmashauri ya Wilaya ya Mbarali Eng. Karoli Lihala alisema kuwa hadi sasa ujenzi wa skimu hiyo umefikia asilimia 10 na wapo kwenye hatua ya msingi ya ujenzi na kazi bado inaendelea.

Eng. Lihala aliongeza kuwa ujenzi wa Banio hilo unaghalamiwa na wakulima kwa kujichangisha michango yao, na hadi kukamilika kwake Banio hilo litagharimu kiasi cha shilingi milioni 220.

Akiongea kwa niaba ya wakulima wenzake Taifa Mbembela ambaye ni Mhasibu wa skimu hiyo alisema kuwa  waliamua kuchangishana wakulima wote kiasi cha shilingi elfu 20 kwa kila hekari ili waweze kujenga Banio hilo, wanaiomba Serikali iweze kuwaongezea nguvu ili waweze kukamilisha ujenzi pamoja na miundombini mingine ya banio hilo.

MWISHO