Uhifadhi wa Misitu uwe ni ajenda ya Kudumu katika Vikao Vyenu - Mbilinyi

Posted on: March 10th, 2020

Hayo yamesemwa na Mjumbe wa Timu Maalumu ya Kutoa elimu ya Uhifadhi Meneja wa Wakala wa Huduma za Misitu Mbeya Bibi Eunice Mbilinyi siku ya tarehe 10/03/2020 wakati akitoa elimu ya ujirani mwema kwa wananchi wanaozungukwa na Hifadhi za Misitu katika Kata ya Mahongole.

Bibi Mbilinyi amesema kwamba wakala wa huduma za misitu (TFS) ndio wenye wajibu wa kusimamia na kuendeleza rasilimali za hifadhi za misitu zote nchini ila ni jukumu la kila mwananchi kuilinda misitu ya Hifadhi kwa faida ya vizazi vijavyo.

"Katika kulinda hifadhi hizi za misitu, Serikali imekuja na miongozo pamoja na makatazo kwa ajili ya kusimamia usafishaji wa mashamba yenye miti pamoja na kuvuna miti. Ni vyema Serikali ya kijiji ikaweka agenda ya uhifadhi wa misitu kuwa ya kudumu katika vikao vyao ". Amesema Bibi Mbilinyi

Mbilinyi amesema kuwa mwananchi hataruhusiwa kufanya shughuli za kibinadamu ndani ya hifadhi za misitu kama kufugia mifugo, kulima, kuchoma moto, kusafisha shamba lenye misitu kujenga makazi bila kuwa na kibali.

Akiongea katika kijiji cha Malamba kata ya Ruiwa, mjumbe mwingine wa timu ya Uhifadhi wa Misitu Kutoka TFS Ndg Joseph Mnangwone aliongeza kuwa mtu yeyote anayetaka kusafisha shamba lenye miti ya asili anatakiwa kutoa taarifa kwenye ofisi za hifadhi ya Misitu zilizo jirani ili aweze kufanyiwa tathimini na kupewa kibali.

Aliongeza kuwa, kukiuka kufanya hivyo utachukuliwa hatua kwa mujibu wa sheria zilizopo “ hakuna gharama yeyote ya kufanyiwa tathimini kwenye shamba lako, unachotakiwa kukifanya ni kutoa taarifa tu, wataalamu watakuja kwa gharama.

Allen Miti Afisa Misitu kutoka Wakala wa Huduma za Misitu amewaeleza wananchi kuwa Serikali ina mpango mkubwa wa kujenga bwawa la kufugia umeme katika hifadhi ya Nyerere na maji yanayotegemewa ni kutoka katika vyazo vilivyoko Ukanda wa mikoa ya Mbeya na Iringa hivyo kila mwananchi ana jukumu la kulinda vyanzo hivyo kwani mradi huu utasaidia katika kubadilisha Uchumi wa maendeleo katika nchi yetu ya Tanzania

MWISHO