Unapofanya Kazi ni Lazima Jasho Lako Lilingane na Kipato Unachokipata – Mfune

Posted on: June 2nd, 2018

Hayo yamesemwa na Mkuu wa Wilaya ya Mbarali Mhe. Reuben Mfune alipokuwa  akiendelea na ziara zake za kutoa elimu kwa wananchi kuhusiana na ujazo wa maguni ili wasiweze kudhulumiwa na baadhi ya madalali pamoja na wafanyabiashara wasio na nia nzuri kwa wakulima katika kituo cha Radio ya Highland FM siku ya tarehe 01/06/2018, pamoja na mikutano ya hadhara katika kata za Itamboreo na Ubaruku siku ya tarehe 02/06/2018.

Katika ziara hizo Mhe. Mfune ameendelea kuwasisitiza wakulima wa Wilaya ya Mbarali kuwa na misimamo katika kujipangia bei, kuwa na umoja, kushikamana pamoja na kuwa na sauti moja pindi wanapouza Mazao yao ili  waweze kunufaika na jasho lao.

“Mifuko zaidi ya debe saba ni marufuku, kuuza mpunga mbichi ni marufuku, madalali pamoja na wafanyabiashara uchwala ni marufuku katika wilaya yangu, ukikamatwa kwa kuzidisha ujazo wa debe saba au kilo 100 za mpunga utalipa faini mara mbili, kwa mujibu wa sheria, sheria namba 340 ya wakala wa vipimo ya kuzidisha ujazo pamoja na sheria ya Halmashauri ya kukwepa kulipa kodi”

“Huwezi kwenda dukani na ukaomba ujipimie mwenyewe sukari, ni lazima utapimiwa na mwenye duka, na inapofika suala la kuuza mpunga, fanya hivyo kwenye mpunga wako, pima mwenyewe”

Akijibu baadhi ya maswali yaliyoulizwa na wananchi kwenye mikutano hiyo Mhe. Mfune alisema kuwa kwa wale ambao walikopeshana fedha na kuahidiana kulipana magunia ya mpunga bila ya kuwa na vibali wala Leseni za kukopeshana kwa mujibu wa sheria, ameagiza kiwango cha kulipana kiwe ujazo wa debe saba kwa gunia au kilo mia tu. Msimu ujao wa Kilimo kukopeshana lazima kufuate sheria zilizoweka.

Aliongeza kuwa kwa msimu ujao wa mavuno itakuwa ni marufuku kwa mkulima kuuzia Mazao shambani, utaratibu utawekwa ili kuwe na soko la pamoja, mfanyabiashara atalazimika kufuata bidhaa sokoni, kufanya hivyo kutasababisha anaelima apate haki yake na anayenunua apate haki yake, na ifike kipindi wizi kwenye mazao uwe mwisho kwa Wilaya ya Mbarali.

Sheria ya Wakala wa Vipimo sura namba 340 kifungu namba 46 kinatamka kuwa ujazo wa gunia la mpunga haitakiwi kuzidi kilo 75, tukiwa tunasubiri mchakato wa sheria kufanyiwa marekebisho na Bunge la Jamhuri ya Muungano wa Tanzania, ujazo uwe wa kilo 100 au debe saba za mpunga, kinyume na hapo hatua za kisheria zitachukuliwa pamoja na adhabu ya faini kuanzia shilingi laki 1(TZS 100,000/=) hadi milioni 50.

Kwa upande Halmashauri ukikutwa na ujazo unaozidi kilo 100 au zaidi ya debe saba za mpunga unakuwa unakwepa kodi, utalazimika kulia faini ya kuanzia laki 2 (TZS 200,000/=) hadi milioni 1 (TZS 1,000,000/=) kwa mujibu wa sheria ya fedha ya mwaka 2017/2018 iliyofanyiwa marekebisho.