Wafugaji Wapata Suluhu ya Muda Mgogoro wa Mpaka wa Hifadhi ya Taifa ya Ruaha

Posted on: April 10th, 2019

Wafugaji wa Wilaya ya Mbarali wamepata suluhu ya muda kuhusiana na malalamiko yaliyotolewa na wafugaji dhidi ya Hifadhi ya Taifa ya Ruaha (RUNAPA) kukamata mifugo yao na kulipishwa faini ya shilingi laki moja (100,000) kwa kila mfugo katika maeneo ambayo wafugaji wanayodaiwa kuwa sio ya Hifadhi.

Kutokana na malalamiko hayo Mkuu wa Wilaya ya Mbarali, Mhe. Reuben Mfune aliamua kufanya ziara kuanzia tarehe 03/04/2019 na kumalizika 08/04/2019 ya kupita maeneo yote ambayo yamekumbwa  na changamoto hizo na kuzipatia suluhu ya muda mfupi huku tukiwa tunasubiri mchakato wa upatikanaji wa suluhu ya kudumu ambao upo katika hatua za mwisho za umaliziwaji wake.

“Nilichokifanya sio maamuzi ya mwisho, nimefanya ziara ili tuweze kuoneshana maeneo ya msingi ambayo yalikwishalipwa fidia na ambayo bado hayajalipwa ili wafugaji waweze kujua wanaishia wapi wanapokwenda kulisha mifugo yao,  tukisubili maelekezo ya mwisho ya mpaka wa kudumu.” 

“Tumeshaelekezana maeneo yote ya mpaka, na maeneo ambayo watu walishalipwa hairuhusiwi kuingiza mifugo, kwa wale watakaotaka kuturudisha nyuma tutawachukulia hatua kwa mujibu wa sheria, hifadhi ni mali ya wananchi wote.” Alisema Mfune

Mhe Mfune ametoa rai kwa wafugaji wote wa wilaya ya Mbarali kuto watuma watoto kwenda kuchunga mifugo, ila watumwe watu wazima wenye akili timamu ambao wanaifahamu mipaka ya muda ambayo wameoneshana na na akasisitiza kuwa isitokee mtu akaja kulalamika kama atawatumia watu ambao hawaifahamu mipaka hiyo.

Aliongeza kuwa Wafugaji na Askari wasiwe chanzo cha kuchochea rushwa na badala yake wawe mstari wa mbele kukemea rushwa, vilevile kwa wafugaji watakaokiuka maelekezo yaliyofanyika na kuingiza mifugo kwenye Hifadhi watatozwa faini isiyozidi kiasi cha shilingi laki moja (100,000) kwa kila ng’ombe kwa mujibu wa sheria zilizopo, faini zote zilipwe kwa njia ya Bank na sio kulipana mikononi.

Nae Kiongizi wa Hifadhi ya Taifa ya Ruaha Ndg. Agricola R. Lihiru amemshukuru Mkuu wa Wilaya kwa kutatua changamoto hiyo kwani wafugaji wengi walikuwa wanahisi wanaonewa pindi inapokamatwa  mifugo ndani ya Hifadhi ya RUAHA.

Baadhi ya wafugaji waliweza kumshukuru Mkuu wa Wilaya kwa kufanya ziara katika maeneo yao na kupata suluhisho la muda, kwani kwa kipindi kirefu mifugo yao ilikuwa ikikamatwa kutokana na kutofahamu mipaka inapoishia.

Mara baada ya kumalizika ziara ya kwenda kutafuta suluhu ya muda, ilibainika kuwa tatizo kubwa lililokuwa linawakabili wafugaji sio kutofahamu mipaka ya Hifadhi bali ni Uhaba wa maji pamoja na malisho kwa ajili ya mifugo.

Katika ziara hiyo Mkuu wa Wilaya aliongozana na Mwenyekiti wa Chama Cha Mapinduzi (CCM) Wilaya, wajumbe wa Kamati ya Ulinzi na Usalama Wilaya, Viongozi na Askali wa Runapa, Wataalamu kutoka Ofisi ya Mkurugenzi wa Halmashauri ya Wilaya ya Mbarali, Viongozi wa Wafugaji, Viongozi wa maeneo husika ambao walikutwa kwenye maeneo pamoja na wafugaji wa maeneo hayo.

MWISHO