WASIO NA VITAKASA MIKONO KUPIGWA FAINI MBARALI

Posted on: April 8th, 2020

Mkuu wa Wilaya ya Mbarali Mhe. Reuben Mfune amewaagiza watendeji wote wa kata pamoja na vijiji kuwachukulia hatua wafanya biashara wote watakaobainika kukaidi agizo la Serikali la kuweka vitakasa mikono ambavyo ni ndoo yenye maji tiririka na sabuni au Sanitizer ambavyo vinatumika kusafishia mikono ili kujikinga na kuwakinga wengine na maambukizi ya Homa kali ya Mapafu (Corona).

Mhe. Mfune ameyasema hayo siku ya tarehe 07.04.2020 alipofanya ziara ya kushtukiza kwenye maeneo ya biashara, vilabu vya pombe, bar pamoja na vijewe vya waendesha bodaboda vilivyopo barabara Kuu kwa ajili ya kutaka kufahamu kama wananchi wana uelewa kuhusiana na ugonjwa wa Corona (COVID 19), kukagua pamoja na kutoa elimu.

”Kuwa na vitakasa mikono sio ombi ni lazima, wale wote watakaokaidi watozwe faini na wafungiwe biashara zao, tusisubiri tatizo litufikie ndio tuanze kuchukua tahadhari, Mbarali tupo njia kuu, tupo kwenye hatari kubwa ya kuambukizwa, tuendelee kuchukua tahadhari, na kuendelea kujiepusha na mikusanyiko isiyo ya lazima, kama huna sababu ya msingi ya kutoka ni bora ukatulia nyumbani, Corona haijali hadhi ya mtu, si mmeshasikia kinachoendelea kwenye mataifa mengine?.” Alisema Mhe. Mfune

Katibu Tawala wa Wilaya ya Mbarali. Ndg. Michael Semindu amewataka wauzaji na wanywaji wote wa pombe za asili pamoja wa wavutaji wa sigara kuacha kupokezana matumizi ya vitu hivyo badala yake kila mtu atumie kikombe au glasi ya peke yake kuepusha hatari ya kueneza ugonjwa wa Corona kwa haraka.

Semindu aliongeza kuwa,ni marufuku wateja kujazana kwenye chumba kimoja, ni vyema anagalau kila mtu akae mita moja na nusu na mwenzie, hatua za kisheria zitachukuliwa kwa wale wote watakaokaidi kufuata maelekezo yanayotolewa na Serikali.

Afisa Afya wa Halmashauri ya Wilaya ya Mbarali Ndg. Saidi Sadick alisema kuwa, sheria ya Afya ya Jamii ya 2009 inawataka wauzaji wa maduka ya madawa za binadamu, madawa ya mifugo, pembejeo za kilimo pamoja na maduka ya nyama kuwa na vitakasa mikono kwa ajili ya matumizi ya ndani mara baada ya kutoa huduma kwa mteja.

Kutokana na kuingia kwa ugonjwa wa Corona watao huduma hao wanatakiwa kuongeza ndoo moja ya ziada kwa ajili ya wateja wao na ni vyema kwa upande wa majumbani kila mtu akawa na kitakasa mikono anapoishi ili kuondoa hatari katika familia yake.

Katika ziara hiyo, Mkuu wa Wilaya amewapongeza wananchi wote wa Wilaya ya  Mbarali wanaoendelea kuchukua tahadhari ya ugonjwa wa Corona na waliotekeleza agizo la Serikali la kununua vitakasa mikono kwa ajili ya kujikinga na kuwakinga na wengine.

MWISHO