WILAYA YA MBARALI YAMWAGA FEDHA KWA VIJANA

Posted on: May 8th, 2017

Mkuu wa Wilaya ya Mbarali, Mh Reuben Ndiza Mfune amekabidhi kiasi cha shilingi Milioni Ishirini na Nane na Mia moja Themanini Elfu (28,180,000/=) tarehe 08 Mei 2017 kwa Vikundi vya Vijana Wilayani Mbarali ikiwa kutekeleza agizo la kutenga asilimia tano (05%) kwa vijana kutoka kwenye vyanzo vya ndani vya mapato vya Halmashauri.

Akikabidhi fedha hizo Mh. Mfune amewataka Vijana kutumia fedha walizopewa kwa ajili ya kuboresha Shughuli zao sababu dhumuni kubwa la kutoa fedha hizo ni kuboresha uchumi na watumie fedha hizo katika shughuli zilizopangwa na sio kugawana na kuzifanyia shughuli nyingine, kwani lengo la Serikali ni kuwainua watoke pale walipo na kupanda zaidi kiuchumi.

"Mbegu ukiipanda inaoza lakini kesho lazima iote ili itoa mazao zaidi, unapopewa mbegu hakikisha unaitumia vyema ili iweze ikuzalishie, tusiende kutumia fedha hizi  kugawana tukafanya shughuli nyingine, ni matumaini ya serikali mtatoka pale mlipo muendeleze zaidi” alisema.

Mh. Mkuu wa Wilaya alisisitiza kuwa pesa zilizotolewa ni lazima zilejeshwe ili ziweze kuwakopesha na wengene, Serikali imewajengea uwezo ili waweze kuendelea na anaamini fedha zilizotolewa zitatumika kama ilivyopangwa. Vilevile aliwataka vijana hao kuionyesha jamii kwamba wanaweza kusonga mbele.

Naye Mkurugenzi Mtendaji wa Halmashauri ya Wilaya ya Mbarali Ndg Kivuma Hamisi Msangi amewaasa vijana kuwa fedha walizopewa sio za kwenda kuolea au kunywea pombe, fedha hizo zitumike katika shuguli zilizopangwa na sio kuanza kupanga shuguli mpya. Vilevile amewajuza kuwa kuna fedha zimebaki wanatakiwa kuwaelimisha na wengine ili waweze kufaidika na fedha hizo za mfuko wa Vijana.

Ndugu Msangi ametoa angalizo kwa vijana hao kutojianzishia vikundi vyao binafsi, na atakaegundulika atachukuliwa kama ni tapeli, amewataka wajiunge katika kikundi kimoja tu na sio kujiunga katika vikundi zaidi ya kimoja kwa sababu kufanya hivyo ni kukiuka utaratibu.

Vikundi vilivyonufaika Mikopo ni, Amka Sasa, Chipukizi Group, Mwitikio Group, Juhudi Group, Maendeleo Group, Jipe Moyo, RIEF, na Kwa Pamoja Tunaweza.