Hifadhi ni Zetu Sote, Faida Zinazopatikana Zinarudi kwa Wananchi - Mathayo

Tarehe ya Kuanza: March 5th, 2020

Hayo yamesemwa na Mjumbe wa Kamati Maalumu ya uelimishaji wananchi juu ya umuhimu wa uhifadhi, Muikolojia kutoka Hifadhi ya Taifa yaTanzania (TANAPA) Ndg Daniel Mathayo alipokuwa akitoa elimu ya Hifadhi za Taifa siku ya tarehe 05/03/2020 katika kijiji cha Matemela Kata ya Ipwani Wilaya ya Mbarali.

Mathayo alisema kwamba, kwa kipindi kirefu wananchi wamekuwa wakiingia ndani mipaka ya Hifadhi na kusababisha misuguano na askari wa Hifadhi kitu ambacho kilipelekea kutokea kwa matukio ya mauaji kitu ambacho Serikali ikaamua kutuma wataalamu kwa ajili ya kutoa elimu Kuhusiana na masuala ya Uhifadhi ili matukio kama hayo yasijirudie

Akiongea katika mkutano wa hadhara alisema kwamba ni kosa kisheria kuingia hifadhini bila kibali, kuwinda wanyama pori, kukutwa na nyama pori, kumiliki siraha hifadhini bila kuwa na kibali, kuvuna mazao ya misitu, kuchimba madini na shughuli zingine za kibinadamu.

“Hifadhi zote zimeanzishwa kisheria na zinaendeshwa kisheria kwa lengo la kutunza wanayama pori na mazingira yao, haina maana wananchi kugombania maeneo yaliyowekwa mipaka, kwani hizi Hifadhi ni mali za watanzania wote.”

“Faida zinazopatikana zinarudi kwa wananchi kwa ajili ya kusaidia miradi ya maendeleo, ni jukumu la kila mtu kutunza Hifadhi zetu, mipaka iliyowekwa inasaidia kujua ni wapi mwananchi anatakiwa kuishia, kwani kuheshimu mipaka iliyowekwa kisheria kutasaidia kupunguza migogoro”

Mjumbe Mwingine wa wa Kamati Maalumu ya uelimishaji wananchi juu ya umuhimu wa uhifadhi Mhifadhi Wanyamapori kutoka TAWA, Ndg. Sylvester Emmanuel aliongeza kuwa Tawa ni Shirika la usimamizi wa wanyama pori Tanzania. Sheria za Tawa hazitofauti na sheria za TANAPA ila kwa upande wa TAWA kuna baadhi ya maeneo wameruhusu uwindaji wa Kitalii pamoja na uwindaji wa kitoweo ambao kwa sasa upo kwenye hatua za majaribio kanda ya Kaskazini.

Tawa inasimamia Mapori Tengefu, Ardhi oevu, bustani za wanyama pori, mashamba na ranchi za wanyama pori na jumuiya za wanyamapori zinazotengwa na wananchi na kusimamiwa na wananchi wenyewe kwani wanyama huwa wanahama kutoka sehemu moja kwenda nyingine kwa ajili ya kutafuta chakura au kukimbia hari mbaya ya kimazingira, sasa kama uhifadhi hautafanyika tutawapoteza hao wanyama.

MWISHO