ZIARA KUSIKILIZA KERO KITONGOJI CHA MOGELO

Tarehe ya Kuanza: October 19th, 2025

MKURUGENZI MWELI AAHIDI KUMALIZA CHANGAMOTO YA MAJI NDANI YA WIKI MOJA KITONGOJI CHA MOGELO MBARALI

Mkurugenzi Mtendaji wa Halmashauri ya Wilaya ya Mbarali Ndugu Raymond Mweli akiambatana na Mkuu wa Wilaya ya Mbarali, Mhe. Brigedia Jenerali Maulid Hassan Surumbu pamoja na timu ya Wataalam wa Idara ya Maji na Umeme wamefanya mkutano wa kusikiliza na kutatua kero katika vitongoji viwili vya Mogelo Ihanga na Mogelo Uhamila vilivyopo Kata ya Rujewa ameahidi kutatua kero ya maji katika Kata hizo ambayo imetokana na kuharibika kwa mtambo wa maji.

Pamoja naahadi ya kutatua changamoto hiyo, kwa upande wake Mkuu wa wa Wilaya hiyo, Brigedia Jenerali Surumbu amewasihi wananchi kuwa watulivu, kudumisha  amani  na mshikamano huku akiagiza Ofisi ya Mkurugenzi wa Halmashauri ya Wilaya hiyo kutafutia utatuzi wa changamoto ya mgogoro uliopo kati ya mpaka wa Kata ya Rujewa na  kata ya Mawindi.

"Nina imani mgogoro huu uliopo kati ya vitongoji hivi viwili kwenye Kata ya Mawindi na Kata ya Rujewa ulifuata utaratibu wa utatuzi, kwa kuwa Mkurugenzi amesema atakwenda kufuatilia tiutafahamu ulitatuliwa kwa namna gani, hivyo kufikia Novemba 05, 2025 naamini tutapata majibu ya ufumbuzi wa changamoto hiyo", amesema Mhe. DC Surumbu.

Kwa upande wa Mkurugenzi Mtendaji wa Halmashauri ya Wilaya ya Mbarali, Ndugu Raymond Mweli ameahidi kukutana na wataalamu wa ardhi ili kufanya tathimini na kufanya tafiti kwa kutembelea maeneo yote yenye mgogoro ili kujiridhisha ikiwa ni pamoja na kupitia nyaraka zote zinazohusiana na mpaka huo.

Aidha akijibu kero ya Maji katika eneo hilo la Mogelo, Mkurugenzi Mweli ameahidi kutatua kero ya maji ndani ya wiki moja ambapo wataalamu wa maji watafanya tathmini kujua ukubwa wa changamoto na namna ya kukabiliana nayo huku akiongeza kuwa Halmashauri ya Wilaya hiyo itachimba visima viwili vya maji katika Vitongoji hiyo kama sehemu ya kukabiliana na changamoto hiyo.

Awali Mwenyekiti wa kitongoji cha Mogelo Uhamila, Ndugu Tilike Taikoo amesema mtambo waliokuwa wanategemea kuleta maji uliharibika kwa takribani mwaka mmoja sasa jambo lililopelekea wananchi wa maeneo hayo kutembea umbali mrefu katika kutafuta huduma ya maji hivyo kukarabatiwa kwa mtambo huo itasaidia kwa sehemu kubwa wananchi hao kupata huduma hiyo.