Mgogoro wa Lembuka (Gulio) Wafikia Tamati

Tarehe ya Kuanza: November 2nd, 2018

Mkurugenzi Mtendaji wa Halmashauri ya Wilaya ya Mbarali, Ndg. Kivuma H. Msangi, amemaliza mgogoro wa sehemu ya kufanyia Lembuka (Gulio) uliodumu kwa muda wa wiki mbili katika Kijiji cha Ruiwa na Kijiji cha Ijumbi vilivyopo katika Kata ya Ruiwa Tarafa ya Ilongo siku ya tarehe 01/11/2018 alipofanya ziara katika kata hiyo.

Katika kutatua mgogoro huo, Msangi aliitisha kikao cha ndani na Serikali zote za vijiji hivyo na kusikilza maoni yao, na baadae alikwenda kuongea na wananchi katika sehemu zinazolalamikiwa akianzia na kijiji cha Ijumbi na Kumalizia kijiji cha Ruiwa ambapo alifanya maamuzi kwa kuongea na wananchi kwenye mkutano wa hadhara.

 “Ugomvi kati ya Ijumbi na Ruiwa sio Lembuka bali ni siku gani Lembuka ifanyike, Lembuka ya Ijumbi iendelee kama ilivyokuwa awali siku ya Jumapili, na kwa upande wa soko la Ruiwa waombe kuanzishwa kwa Lembuka, ila siku zitofautiane na Lembuka ya Ijumbi, kaeni kama Serikali pendekezeni siku nyingine ya kufanya gulio na mniletee ili niwaruhusu kwa barua.”

“Zipo taratibu za kudai haki, ila sio kwa kuchoma vibanda vya wa watu, fanyeni mikutano ya hadhara, waelezeni wananchi hiki walichokifanya sio kizuri, tunachotaka ni amani na hakuna mtu alie juu ya sheria.”

Naye Diwani wa kata ya Ruiwa Mhe. Kassim Mtale amemshukuru Mkurugenzi Mtendaji wa Halmashauri ya Wilaya ya Mbarali kwa kutenga muda wake na kuja kumaliza mgogoro uliopo baina ya vijiji vyake viwili katika Kata ya Ruiwa.

Mgogoro kati ya vijiji hivyo viwili, ulioanza tangu usiku wa kuamkia tarehe 21/10/2018 na kusababisha madhara mbalimbali yakiwemo  kuchomwa kwa vibanda kwenye soko la kijiji cha Ruiwa, Kufungwa kwa ofisi ya kata, kufungiwa ndani kwa baadhi ya watendaji wa vijiji na kata pamoja na kurushiana maneno yasiyo faa.

Mgogoro huo uliodumu kwa kipindi cha wiki mbili, umemalizika na wale wote waliosababisha vurugu na kuvunjika kwa amani walishakamatwa na vyombo vya ulinzi, na kufunguliwa kesi mahakamani.

MWISHO