WAJUMBE HALMASHAURI YA CCM WILAYA YA MBARALI WAIPONGEZA HALMASHAURI KWA UTEKELEZAJI WA ILANI 2020-2025.

Tarehe ya Kuanza: January 19th, 2026

Mkuu wa Wilaya ya Mbarali, Mhe. Brigedia Jenerali Maulid Hassan Surumbu ameishukuru Halmashauri ya Chama cha Mapinduzi Wilaya ya Mbarali kwa kuipokea, kuijadili na kuipitisha taarifa ya utekelezaji wa Miradi ya Maendeleo katika kutekeleza ilani ya Chama hicho ya mwaka 2020-2025 kwa kipindi cha Julai mpaka Desemba 2025 ambapo taarifa hiyo inahusu utekelezaji wa ilani kwa sekta mbalimbali ikiwemo elimu, afya na miundombinu.

Taarifa hiyo imewasilishwa na Mkuu huyo wa Wilaya mbele ya Wajumbe hao wakiongozwa na Mwenyekiti wa CCM Wilaya ya Mbarali, Bi. Mary Obadia Mbwilo, Katibu wa Chama hicho, Maranyingi Matukuta na Mwenyekiti wa Halmashauri ya Wilaya hiyo, Twalib Lubandamo.

“Sehemu ya mafanikio ambayo yamepatikana ni pamoja na kuongezeka vituo vya kutolea huduma za afya, ongezeko la idadi ya shule za msingi na sekondari, shule 5 zenye miundombinu za TEHAMA, mradi wa miundombinu za maji ambao unaendelea,” amesema Brig. Jen. Surumbu.

Aidha Mkuu huyo wa Wilaya amepongeza namna ambavyo wananchi wameshiriki moja kwa moja kuhakikisha kunakuwa na hali ya ulinzi na usalama katika maeneo yao na kuwasihi kuendeleza ushirikiano huo na vyombo vya dola ili kuwepo na utulivu utakaosaidia wananchi kujishughulisha na shughuli za maendeleo.

“Nawashukuru Wananchi wa Mbarali wamekuwa mstari wa mbele kuhakikisha hali ya ulinzi na usalama katika maeneo yao, wapo waliothubutu kuripoti na wengine wakichukua hatua za kuwakamata wahalifu na kuwafikisha katika vyombo vya dola ili wachukuliwe hatua za kisheria,” amesema Brig. Jen. Surumbu.

“Tuna wajibu kusimamia utekelezaji wa maelekezo yaliyomo kwenye ilani yanayohusu miradi ya maendeleo, tutelekeleza pamoja na kuhakikisha kila mmoja wetu anawajibika kutatua kero na changamoto zinazowakabili wananchi, sisi ni watumishi wao,” amesema Mkurugenzi wa Halmashauri hiyo Ndugu Raymond Mweli.

Kwa upande wake Mwenyekiti wa Halmashauri Wilaya ya Mbarali, Ndugu Twalib Lubandamo amewaasa Wajumbe wa Halmashauri hiyo kuyazungumzia mafanikio yaliyofanywa chini ya uongozi wa Rais Dkt. Samia Suluhu Hassan kwa wananchi katika kuwaletea maendeleo