DC Apiga Marufuku Watoto Kuonekana Maeneo ya Machimbo.

Tarehe ya Kuanza: May 12th, 2021

Mkuu wa Wilaya ya Mbarali Mhe. Reuben Mfune, amepiga marufuku watoto wote wenye umri chini ya miaka 18 kuonekana kwenye maeneo yote yanayojihusisha na uchimaji wa madini wilayani Mbarali kwani maeneo hayo sio salama kwao.

Mhe Mfune ameyasema hayo kwenye Mkutano wa hadhara yanapochimbwa Madini ya Dhahabu Kata ya Mapogoro na Lugelele siku ya tarehe 11/05/2021 alipofanya ziara na Kamati ya Usalama Wilaya kutembelea, kukagua pamoja na kutoa elimu ya Afya na Mazingira kwa wachimbaji wa maeneo hayo.

 “Marufuku kuleta watoto kwenye maeneo ya machimbo, tukija tena na tukakuta watoto huku, utakachokipata utasimulia, kwanza hairuhusiwi kuajili watoto wadogo, ukimleta mtoto hapa unamuweka kwenye mazingira hatarishi, acheni watoto nyumbani na nyie mje huku fufanya kazi.”

“Leo tumekuja kutoa elimu, tukija siku nyingine tutakuja kuchukua hatua kwa mujibu wa sheria, watakaokiuka watapata sadaka zao, nachowaomba tulinde usalama wetu, na mtu wa kwanza kulinda usalama wako ni wewe mwenyewe.”  Alisema Mhe. Mfune

Mhe Mfune amewataka wachimbaji wote kuendelea kuchukua taadhari ya maisha yao kwa kujikinga na mambo mbalimbali ikiwemo kuchukua tahadhari dhidi ya magonjwa ya Corona na Ukimwi, uvutaji wa bangi, unywaji wa pombe kupita kiasi, na wakumbuke kuwa kuna watu wanawategemea, na kama wataona kuna kitu hakipo sawa washauri ili taratibu ziweze kufuatwa.

Mkurugenzi Mtendaji wa Halmashauri ya Wilaya ya Mbarali Ndg. Kivuma Msangi alisema kwamba hategemei Dhahabu inayopatikana Mbarali ikawa kama laana ya kuleta ugomvi na migogoro, kwani watu wote wamekuja kutafuta pesa. Amewataka waachane na Imani potofu kwani masuala hayo yatasababisha kuvurugika kwa Amani.

“Yakitokea masuala ya Imani potofu tutaanza na nyie hakuna sehemu inayosema ili madini yapatikane ni lazima muue mtu.” Alisema Msangi

Naye Afisa Usafishaji na Mazingira wa Halmashauri ya Wilaya ya Mbarali Ndg. Raphael Shitindi alisema kuwa wamiliki wa maendeo ya uchimbaji wa madini wanatakiwa kufanya tathimini ya athari ya mazingira ili kukabiliana na mambo mabaya ya uharibifu wa mazingira kwa ajili ya usalama wa watu wote.

Wakiongea katika nyakati tofauti baadhi ya wachimbaji wadogowadogo wameiomba Serikali kuendelea kutoa elimu ya mazingira, kuwatafutia soko pamoja kuwasaidia kupata maslahi mazuri kwa wamiliki wa mashimo ya madini na wamiliki wa makarasha kwani wamekuwa wakifanya kazi kubwa ila maslahi ni madogo.

Katika ziara hiyo vilevile Mkuu wa Wilaya aliweza kutembelea mradi wa Ujenzi wa Chuo cha Ufundi Stadi VETA, Ujenzi wa Stendi ya Igawa, kukagua uharibifu unaofanyika kwenye Reli ya TAZARA, Maeneo ya Hifadhi yanayosimamiwa na TAWA ambayo yanayovamiwa na wananchi pamoja na eneo la Machimbo ya Dhahabu.

MWISHO