DC AWATAKA WAKULIMA KULIMA KUTOKANA NA UWEZO WAO

Tarehe ya Kuanza: October 8th, 2019

Mkuu wa Wilaya ya Mbarali Mhe. Reuben Mfune amewataka wakulima wote wa Wilaya ya Mbarali kulima kutokana na uwezo wao na sio kukopa mikopo mikubwa kwa watu binafsi wasiotambulika kisheria ambapo inakua shida kurudisha mikopo hiyo wakati wa mavuno.

Ameyasema hayo siku ya tarehe 08/10/2019 kwenye kikao cha Uzinduzi wa Msimu wa Kilimo alichokiitisha katika ofisi yake na kuhudhuriwa na wadau mbalimbali kutoka kwenye Taasisi binafsi za kilimo, Taasisi za Serikali, viongozi wa wakulima pamoja na baadhi ya wakulima kutoka maeneo mbalimbali wilayani hapa.

 “Ni heri ulime hekari moja kwa nguvu zako mwenyewe kuliko kulima hekari 20 lakini siku ya mavuno anakuja aliekukopesha na mabaunsa wake kuchukua Mpunga wote ukiwa unaangalia anavyoondoka nao, wewe unarudi nyumbani mikono mitupu, hapo utakuwa umemfanyia kazi yeye sio wewe kupata faida.”

“Nawasihi wakulima wote kukopa kwenye Taasisi za Kifedha ambazo zimesajiliwa na Serikali na zinatambulika kisheria kwani riba zao zinasimamiwa na Serikali kuliko kukopa kwa watu binafsi ambao hawatambuliki kisheria na riba zao ni mara tatu zaidi ya fedha ulizokopa” Alisema Mhe Mfune

Aidha amevitaka baadhi ya vikundi vya wakulima kuwa waaminifu wanapoomba mikopo kwenye taasisi za kifedha kwani kumekuwa na usumbufu kwenye marejesho ya mikopo hiyo kama kikundi, tofauti na wanavyotoa mkopo kwa  mkulima mmoja mmoja kwani mikopo hiyo imekuwa ikirejeshwa kwa wakati muafaka.

Katika kulekea katika msimu mpya wa kilimo  Mhe. Mfune aliwataka Maafisa Ugani kutoa mafunzo stahiki ya matumizi sahihi ya pembejeo za kilimo na kuwafundisha wakulima ili kuleta tija katika kilimo na sio kusubiri makongamano ya kilimo ambayo hayafanyiki mara kwa mara.

MWISHO