Kamati ya Siasa ya CCM Mkoa wa Mbeya Yafanya Ziara Wilaya ya Mbarali Kukagua Utekelezaji wa Ilani ya Chama Cha Mapinduzi

Tarehe ya Kuanza: March 28th, 2018

Kamati ya Siasa ya Chama Cha Mapinduzi Mkoa wa Mbeya ikiongozwa na Mwenyekiti wa Chama hicho  Ndg.  Jacob Mwakasole imefanya ziara katika Wilaya ya Mbarali kwa ajili ya kutembelea Miradi mbalimbali ikiwa ni kujionea na kukagua  Utekelezaji wa Ilani ya Chama Cha Mapinduzi siku ya tarehe 27.03.2018

Katika Ziara hiyo, Kamati ya Siasa Mkoa imeweza kutembelea miradi mbalimbali ikiwamo Bwala la Lwanyo lililopo katika Kata ya Igurusi, Ujenzi wa Mfereji wa skimu ya Umwagiliaji Igomelo uliyopo katika Kata ya Lugelele, Ujenzi wa Barabara ya Igawa-Madibira pamoja na Mpaka wa Hifadhi wa RUNAPA (TANAPA) uliopo katika Kata ya Imalilo Songwe.

Katika Mradi wa Lwanyo uliopo Kata ya Igurusi, Kamati imeweza kutembelea mradi huo na kujionea Utekelezaji wake sambamba na kuzungumza na baadhi ya wananchi ambao wameweza kuelezea changamoto mbalimbali zinazoukabili mradi huo na wamemuomba Mwenyekiti wa CCM Mkoa kwenda kufanyia kazi changamoto zote walizozitaja ili uweze  kunufaisha wananchi wote wanaouzunguka mradi.

Wakiwa katika kata ya Lugelele Kamati imeweza kutembelea ujenzi wa Mrefeji wa Skimu ya Umwagiliaji Igomelo na kujiridhisha na Maendeleo yake. Wakiwa katika mradi huo changamoto mbalimbali ziliweza kujitokeza ikiwemo mgogoro wa mpaka kati ya Hifadhi ya Waga na Skimu ya Umwagiliaji ambayo inawafanya wakulima wa skimu hiyo kuwa na mgogoro na Hifadhi.

Vilevile Kamati ya Siasa waliweza kutembelea ujenzi wa barabara ya Igawa –Madibila ambayo inaendelea kujenga na wameridhishwa na ujenzi huo ila wamemtaka msimamizi wa Mradi huo (TANROAD) kusimamia vyema mradi huo ili uweze kukamilika kwa wakati na wananchi waweze kunufaika nao.

Kamati ilimalizia Ziara yake katika Kata ya Imalilo Songwe ambako kuna mgogoro wa mpaka kati ya Hifadhi ya Ruaha (TANAPA) na wananchi. Mgogoro huo mchakato wake wa ufumbuzi umeshawasilishwa ngazi husika kwa ajili ya kufanya maamuzi kwani maoni mbalimbali kutoka kwa wananchi yameshapokelewa. Mwenyekiti amewaahidi wananchi wa Kata ya Imalilo Songwe na Mbarali kwa ujumla kuwa wavumilivu kwani atafanya jitihada za kuongea na wahusika ili tatizo hilo liweze kutatuliwa haraka kwa manufaa ya pande zote mbili.

Akiongea na Viongozi wa Wilaya upande wa Chama Cha Mapinduzi (CCM) pamoja na upande wa Serikali katika Ofisi ya Mkuu wa Wilaya wakati wa kuhitimisha Ziara yake,  Mwenyekiti wa CCM Mkoa  amewashukuru Viongozi wote kwa ushirikiano walioutoa wakati wa Ziara pamoja na kazi wanazozifanya katika kuhakikisha wanawaletea wananchi wa Mbarali Maendeleo. Kuhusiana na changamoto walizozikuta kipindi cha ziara  atakwenda kuzifanyia kazi kwa kuonana na wahusika ili ziweze kutatuliwa

Mwenyekiti amemtaka Mkuu wa Wilaya ya Mbarali Mhe. Reuben Mfune kuendelea kushirikiana na Viongozi mbalimbali wa Wilaya upande wa chama pamoja na taasisi anazozisimamia katika kutatua migororo inayowakabili wananchi wa Mbarali ikiwemo migogoro ya mipaka, mashamba pamoja na ugomvi kati ya wakulima na wafugaji kwani migogoro hiyo ndio migogoro mikubwa inayoikabili Wilaya ya Mbarali.