Mkuu wa Wilaya Afurahishwa na Kasi aa Ujenzi wa Zahanati na Vyumba vya Madarasa Wilaya ya Mbarali

Tarehe ya Kuanza: March 27th, 2018

Mkuu wa Wilaya ya Mbarali, Mhe. Reuben Mfune amefurahishwa na kasi ya ujenzi wa vyumba vya Madarasa na Zahanati alipofanya ziara tarehe 26.03.2018 katika Kata za Miyombweni, Igava pamoja na Mawindi kwa ajili ya kujionea Maendeleo ya ujenzi  unavyoendelea pamoja na kujiridhisha utekelezaji wa Maagizo aliyoyatoa kwa maafisa Ugani katika kuboresha kilimo siku ya tarehe 03.11.2017

Akiwa katika Kata ya Miyombweni, Mhe Mfune amevitaka Vijiji vya Magigiwe na Miyombweni  kukamilisha ujenzi wa Zahanati haraka iwezekanavyo na ameahidi kurudi tena mwishoni mwa mwezi wa saba ili kujionea hatua zilizofikiwa.

Kuhusu Ukamilishaji wa vyumba vya madarasa kwa kata ya Miyombweni, ameagiza hadi kufikia tarehe 31.03.2018 madarasa yote yawe yamekamilika.  Vilevile amewapongeza maafisa Ugani wa kata hiyo kwa kufanya kazi za kuwahudumia wakulima na amewataka waongeze jitihada ili wakulima waweze kujiongezea kipato.

Akiwa katika Kata ya Igava, Mhe Mkuu wa Wilaya, amevipongeza Vijiji vilivyomaliza ujenzi wa zahanati na amekitaka Kijiji cha Vikae kuanza ujenzi haraka na hadi kufikia June mwaka huu ujenzi uwe umefikia katika hatua nzuri.

Kwa upande wa vyumba vya madarasa amewapongeza kwa kazi nzuri wanayoifanya kwani kwa hatua waliyofikia wanaziada ya vyumba viwili vya madarasa na amewataka kuanza kuandaa Madawati kwa vyumba vilivyozidi. Na kwa upande wa Kilimo amewataka maafisa Ugani kujitahidi kuwafikia wananchi kadri wawezavyo na waendelea kutoa elimu kwa kutumia mikutano ya hadhara.

Akiwa katika Kata ya Mawindi, Mhe Mfune ameridhishwa na ujenzi wa Bwalo la Chakula la wanafunzi unaoendelea katika shule ya Sekondari Mawindi na amewataka kuongeza kasi ili wanafunzi waanze kulitumia bwalo hilo mapema iwezekanavyo.

Mhe Mkuu wa Wilaya amefurahishwa na kasi iliyopo ya umaliziaji wa Kituo cha Afya mawindi na amevipongeza Vijiji vyote kwa kukamilisha ujenzi wa zahanati sambamba na kuwapongeza maafisa Ugani kwa kuendelea kutoa elimu kwa wananchi hasa katika zao la korosho.

Akihitimisha ziara yake, Mhe Mfune amewataka maafisa ugani wote kuendelea kutoa elimu kwa wananchi na kuhakikisha wapo sambamba hadi msimu wa mavuno utakapokamilika, kuwaelimisha wakulima katika uhifadhi wa Chakula, namna ya kuweka dawa na kutoa ushauri kuhusu msimu wa kuuza Mazao ili waweze kupata faida na waweze kuendana na soko.

kuhusu zahanati Mhe Mkuu wa Wilaya amevitaka Vijiji vyote ambavyo bado havijamaliza ujenzi wa Zahanati kumalizia ujenzi mapema na ameahidi kupita mwishoni mwa mwezi wa saba ili kujionea kinachoendelea.

Daudi B. Nyingo

Afisa Habari na Mahusiano

Halmashauri ya Wilaya ya Mbarali Mbeya