Tuheshimu Mawazo ya Wasaidizi Wetu -Msangi

Tarehe ya Kuanza: September 14th, 2018

Hayo yamesemwa na Mkurugenzi Mtendaji wa Halmashauri ya Wilaya ya Mbarali Ndg Kivuma H. Msangi alipoitisha kikao kazi na Watumishi wote wa Halmashauri akiwa na leongo la kusikiliza kero na kutatua kero mbalimbali zinazowakabili watumishi walio chini yake, kukumbushana majukumu ya kazi ya kila siku pamoja na kujadili suala la ukusanyaji wa mapato ya Halmashauri.

Akizungumza katika kikao hicho, Msangi aliwataka watendaji wa kata na vijiji Kusimamia kwa umakini uandikishaji wa vyeti vya kuzaliwa kwa watoto wenye umri wa chini ya miaka mitano kwani vyeti hivyo vinatolewa bure, umaliziwaji wa madarasa ya kupokelea watoto wa kidato cha kwanza, zahanati pamoja na ujenzi wa vyoo bora kwa wananchi ambao hawana vyoo na wenye vyoo ambavyo havijakubalika ikiwa na kusimamia kutumika kwake maana kuna wanaojenga vyoo ila hawavitumii.

"Mshahara haujawahi kutosha kwa mfanyakazi, hata ukilipwa kiasi gani bado hautoshi, kikubwa ni kusimamia matumizi yako na tusitengeneze madeni yanayozidi mishahara yetu".

Vilevile Mkurugenzi Mtendaji amewaasa watumishi wote walio chini yake kwenda kusoma Ilani ya Chama Cha Mapinduzi (CCM) na kila mtumishi akaitekeleze kulinganga na idara yake pamoja na majukumu aliyopangiwa.

Naye Afisa Utumishi na Utawala wa Halmashauri ya Wilaya Mbarali Ndg. Aswege Kaminyoge akijibu baadhi ya maswali yaliyoulizwa na watumishi alisema kuwa kila mtumishi wa umma anastahili kupanda daraja miaka minne mara baada ya kuajiriwa, na mara baada ya kupanda daraja moja mtumishi wa umma atapandishwa daraja kila baada ya miaka 3 kama ametimiza vigezo vilivyowekwa kisheria ambavyo ni; ufanyaji wa kazi kwa bidii, kama amejaza Fomu ya Wazi ya Mapitio ya Utendaji Kazi (Opras) pamoja na uwepo wa bajeti na nafasi.

Kuhusiana na madai ya Uhamisho, Kaminyoge ameahidi kulifanyia kazi na kuanza kulipa kwa mwaka huu wa fedha 2018/2019.

Watumishi wamemshukuru Mkurugenzi Mtendaji kwa kuitisha kikao hicho cha pamoja kwani kinawawezesha kutoa kero zao zinazowakabili kwa muda mrefu na wamemuomba kuitisha vikao hivyo mara kwa mara.

Daudi Nyingo

Afisa Habari

Halmashauri ya Wilaya ya Mbarali

Mbeya

14/09/2018