Watendaji 42 Warudishwa Kazini Mbarali

Tarehe ya Kuanza: April 18th, 2018

Halmashauri ya Wilaya ya Mbarali, imewarejesha kazini watendaji wa vijiji 42 waliosimamishwa kazi ikiwa ni Utekelezaji wa agizo lililotolewa na Waziri wa Nchi Ofisi ya Rais Menejimenti ya Utumisi wa Umma na Utawala Bora Mhe. George Mkuchika (Mb), lililowataka waajiri wote kuwarejesha watumishi ambao waliajiriwa kabla ya Mei 20, 2004.

Akizungumza na watendaji hao ofisini kwake siku ya Jumatatu ya tarehe 16 Aprili 2018, Mkurugenzi Mtendaji wa Halmashauri ya Wilaya ya Mbarali, Ndg. Kivuma H. Msangi amewataka Watendaji wote waliorudishwa kazini kwenda kufanya kazi kwa bidii ikiwamo kutatua kero za wananchi na kuhakikisha zinaishia kwenye maeneo yao, kushirikia na Viongozi wa ngazi zote pamoja na kuhakikisha vikao vyote vya kisheria vinaitishwa.

“Tunawaamini mkafanye kazi, anzeni kwa spidi mpya, mkaonyeshe pengo lenu ili kila mtu aone umuhimu wenu, mkatoe ushirikiano kwa watendaji wapya waliojiriwa maana wengi ni wageni wanategemea uzoefu wenu”

Naye Mkuu wa Idara ya Utumishi na Utawala Ndg. Aswege Kaminyoge, amewataka watumishi wote waliorudishwa kazini kuwa wavumilivu kuhusiana na suala la mishahara pamoja na stahiki zao kwani Serikali itatoa utaratibu wa upatikanaji wake.

Akimalizia Ndg. Mganga Ngomuo ambae ni Mkuu wa Idara ya Maendeleo ya Jamii, amewapongeza watumishi hao kwa kuwa na subira kwa muda wote waliokuwa nje ya vituo vyao vya kazi bila malalamiko yeyote na amewaasa kwenda kufanya kazi kwa bidii ili waonyeshe utofauti ikiwa pamoja na kwenda kuwajengea uwezo watendaji wapya waliojiliwa.

Akizungumza kwa niaba ya watumishi wote waliorudishwa kazini Ndg. Blastus Minzi alisema kuwa, wamepokea vizuri na kwa furaha kurudishwa kazini kwani hawakutegemea kurudi tena kuwatumikia wananchi, vilevile  ameishukuru Serikali kwa kuwajari na kuthamini mchango wao na wameahidi kufanya kazi kwa bidii kwa kwa mujibu wa sheria kwa manufaa ya wananchi wote wa Mbarali.