Waziri wa Maji Atembelea Bwawa la Lwanyo Mbarali

Tarehe ya Kuanza: March 24th, 2018

Waziri wa Maji na  Umwagiliaji Mhe. Mhandisi Isack Kamwelwe amefanya ziara katika Wilaya ya Mbarali siku ijumaa ya tarehe 23/03/2018 ili kujionea changamoto mbalimbali zinazolikabili Bwawa la Lwanyo  ililopo katika Wilaya ya Mbarali ambalo limejengwa na kusimamiwa na Tume ya Umwagiliaji  Kanda ya  Mbeya kupitia Wizara ya Maji na Umwagiliaji.

Akiwa katika bwawa hilo Mhe. Waziri amejionea changamoto mbalimbali linazolikabili Bwawa hilo zikiwamo Uvujaji wa maji baadhi ya sehemu za ukuta, maji kubadili njia pamoja na chemchemu iliyopo eneo hilo na ameahidi kwenda kulitafutia ufumbuzi kwa kushirikiana na wataalamu wake kutoka wizarani.

Mhe. Kamwelwe ameahidi  kutoa tamko ndani ya wiki mbili mara baada ya kwenda kuangalia upya mchoro wa bwawa hilo ili kuweza kubaini tatizo na kulitafutia ufumbuzi vilevile kujiridhisha ili isitokee akamwonea mtu kama atabaini kuna uzembe ulifanyika kipindi cha ujenzi wa bwawa au kama kuna vitu vimefanyika bila kufuata utaratibu.

“Hatuwezi kuvaa nguo iliyochakaa baadae uvae koti jipya juu, tuvae zote zilizo mpya ili tukae salama”

Akiwa katika ziara hiyo Mhe. Waziri ameweza kusikiliza maoni mbalimbali ya wananchi ambao wamezungumzia athari wanazozipata kuhusiana na bwawa hilo pamoja na changamoto zilizojitokeza kipindi cha ujenzi, kwani baadhi yao walikuwa ni vibarua kipindi Bwawa linajengwa.

Kukamilika kwa Bwawa la Lanyo kuna faida kubwa kwa ustawi wa wananchi wa Mbarali hasa katika kata zinazoizunguka kata ya Igurusi. Faida hizo ni kuzuiwa kwa maafuriko yanayosababishwa na mvua kubwa zinazonyesha, kuvunwa kwa maji ya mvua na kutumika katika Kilimo kipindi cha kiangazi na masika ambapo itasaidia kuongeza kipato kwa wakulima kwani kipindi cha masika kunakuwa na ongezeko la hekta 1000 za Mazao na kipindi cha kiangazi kunakuwa na ongezeko la hekta 400 za mazao ya Kilimo, vilevile  maji hayo kutumika katika shughuli za kawada za majumbani  pamoja na viwandani.

Daudi Nyingo

Afisa Habari na Mahusiano

Halmashauri ya Wilaya ya Mbarali Mbeya