Corona Bado Ipo, Tusijisahau, Tuendelee Kuchukua Tahadhari-Mfune

Tarehe ya Kuanza: June 4th, 2020

Mkuu wa Wilaya ya Mbarali Mhe. Reuben Mfune, amewataka wakazi wote wa Wilaya ya Mbarali, kuendelea kuchukua tahadhari ya kujikinga dhidi ya ugonjwa wa Corona kwa kufuata taratibu zote zilizotoleana na Viongozi Wakuu wa Nchi pamoja na Wizara ya Afya  kwani kwa sasa baadhi ya sehemu watu wamejisahau.

Mhe. Mfune ameyasema hayo, siku ya tarehe 03/06/2020 alipokuwa akifungua warsha iliyoandaliwa na shirika lisilo la kiserikali la MBENGONET (Mbeya NGO's Network) kwa ajili ya Kujenga uwezo kwa jamii na kuimarisha mifumo ya Serikali ili kupunguza kasi ya ongezeko la maambukizi ya COVID-19 na kuleta Mabadiliko chanya dhidi ya mila, desturi  na tabia zinazochangia maambukizi katika mkoa wa Mbeya.

Mkuu wa Wilaya amelitaka shirika hilo kufika maeneo yote yenye mikusanyiko mikubwa ya watu kama miji midogo iliyopo barabara kuu ya TANZAM na watakapokuwa wanatoa elimu hiyo wasiwajengee  hofu wananchi, ila wawape ujumbe na kuwaelekeza kuendelea kujikinga na kuchukua tahadhari sambamba na kuendelea kufanya kazi kwa bidii ili kuinua vipato vyao na uchumi wa nchi.

“Watu wengi wanatafsiri vibaya kauli ya Rais wa Jamhuri ya Muungano wa Tanzania Mhe. Dkt John Pombe Magufuli. Mhe. Rais Magufuli hajasema Corona imeisha Tanzania, ila kasema Corona imepungua kwa kiasi kikubwa nchini kwetu. Kuna baadhi ya watu kwenye jamii wanapuuza taratibu za afya zilizowekwa ili kupunguza uwezekeano wa kuenea kwa ugonjwa huu hasa katika sehemu zenye mikusanyiko.”

“Siku hizi tunajikinga na Corona tunapotoka nyumbani kwenda kwenye mihangahiko yetu, ila tunasahau kuzikinga familia zetu pale tunaporudi nyumbani, ni vyema kila mtu akachukua tahadhari kwa kuweka ndoo yenye maji tiririka na sabuni nyumbani kwake.” Alisema Mfune

Naye Katibu Mtendaji wa Shirika la MBENGONETI Ndg. Paul Kita alisema kuwa Shirika limejipanga kwenda kutoa elimu  ya kujikinga na COVID- 19  na kuhamasisha matumizi ya Barakoa na vitakasa mikono kwa waendesha Bodaboda, Madereva wa Bajaji, kwenye minada pamoja na kwenye Mikusanyiko kwa kushirikiana na Wataalamu kutoka Serikalini.

Ndg. Kita aliongeza kuwa baadhi ya watu katika jamii yetu wameanza kukusanyika kwenye baadhi ya maeneo bila kuchukua tahadhari na wamegundua baadhi ya maeneo mengi ni machafu kitu ambacho kitasababisha  magonjwa mengine ya mlipuko kwani kinachoua watu kwa sasa sio Corona pekee hata uchafu na magonjwa mengine

Shirika lisilo la Kiserikali la MBENGONET linajihusisha na Uelemishaji,  Uhamasishaji  na Ushawishi  wa shughuli za maendeleo katika sekta ya afya, kilimo, maji, elimu, Utawala bora pamoja na Haki za binadamu.

MWISHO