DC Mbarali azitaka Taasisi Kutoa ajira kwa Wahitimu wa Jeshi la Akiba

Tarehe ya Kuanza: November 23rd, 2020

Mkuu wa Wilaya ya Mbarali Mhe. Reuben Mfune amezitaka Taasisi za Serikali, Taasisi za watu binafsi, Mashirika pamoja wamiliki wa Makampuni mbalimbali ndani ya Wilaya ya Mbarali na maeneo mengine kutoa vipaumbele vya ajira kwa wananchi waliopitia Mafunzo ya Jeshi la Akiba.

Mhe Mfune ameyasema hayo siku ya tarehe 23/11/2020 alipokuwa akihitimisha mafunzo hayo katika kata ya Chimala iliyopo Tarafa ya Ilongo.

“Naendelea kuwasisitiza wale wote wanaotoa ajira ndani ya wilaya yetu na maeneo mengine waendelee kutoa kipaumbele kwa wale ambao wamepitia mafunzo ya Jeshi la Akiba.”

“Tunawaandaa vijana kusaidia ulinzi wa nchi yetu, tunawaandaa vijana ambao watakuwa Jeshi la Akiba chini ya uongozi wa Jeshi la wananchi wa Tanzania, tunawaandaa vijana wenye maadili na Utiifu watakaoshirikina na wananchi katika maeneo tunayotoka kwa ajili ya shughuli mbalimbali za kimaendeleo.” Mhe. Mfune

Mhe Mfune aliongeza kuwa, Mafunzo ya Jeshi la Akiba yana faida nyingi zikiwemo kuwa chachu ya maendeleo katika maeneo wanayotoka, kusaidia ulinzi wakati  wa matukio muhimu ya kitaifa ikiwemo uchaguzi na mitihani.

Naye Mshauri wa Jeshi la Akiba Wilaya ya Mbarali Capt. K.J Kalinga alisema kuwa mafunzo haya yamejumuisha vijiji 6 vya kata ya chimala na yalianza tangu tarehe 20/07/2020 kwa muda wa miezi 4 na hadi kufikia sasa jumla ya wanafunzi 51 wamehitimu mafunzo hayo kati yao wanaume 40 na wanawake 11.

Akiongea kwa niaba ya wenzake kuptia Risala waliyoiandaa mhitimu wa mafunzo hayo Baraka Mboya ameushukuru uongozi wa Wilaya pamoja na Jeshi la Ulinzi la Wananchi wa Tanzania kwa kuwapa mafunzo hayo kwani wamejifunza mambo mengi ikiwemo ushirikiano, siraha mbalimbali za kivita, ujanja wa porini, mbinu za ukakamavu, usalama wa raia, uhamiaji, zimamoto pamoja na huduma ya kwanza.

Mafunzo ya Jeshi la akiba katika kata ya chimala yamehudhuriwa na watumishi wa Serikali 3 wakiwemo Maafisa watendaji wa Vijiji 2 pamoja na Mwalimu mmoja wa shule ya msingi.

MWISHO